Gelhtu: LB Muan M.Th in Counselling
18/07/18
July 18, 2018 in Thailand gam ah naupang football peksiam mi 12 leh a Coach-pa uh Cave (kawl-hawm) sungkhat valut thuk lawkha ua, vuah azuk ziak in kawl-hawm sung ah tui hongtam in pawt khethei nawnlou in kalnih val vatangkha uhi.
Ka lungsim hon khoihkha mahmah a, ka hihtheih dang omlou ahih chiang in ka na thumpih hi. News ah thuthak zak di om hiam chi in hunteng in ka enzel a, hut khiak a aom vekma uh ka na ommuang thei hetkei hi. Naupangte’ dinmun a ka kikoih chiang in mangbat-huai leh lungziin-huai kasa a, a nu-le-pate’ uh dinmun a ka kikoih chiang in beidot-huai kasa petmah hi. Rescue team-te’ dinmun a ka kikoih chiang in risky leh lauhhuai kasa zel hi…Gam tuamtuam in hun sawtpi a buaipih nung un hut khiak in omvek khong uhi.
Hiai naupangte hutkhiak himahle uh adinmun uh buaipihtouh ding bangzah hiam om hi. Kawl-hawm sung a hun sawttak vatangkha ahihman un physical leh psychological effects om ding hi. Hiaite apat hut khiakna ding in, Doctor, Psychologist/Counsellor, naupangte’ sungkuante, school a teacher-te ban ah alawm polhte’ uh panpihna poimohvek ding uhi.
1. Physical Care.
Hiai pen a poimoh mahmah ziak in damdawi inn ah puaklut in om ngal ua, asungte utawh kimu saklou in hoihtak in kem ngal uhi. Cave Disease (Histoplasmosis) khawng leh natna hoihlou avei kha uhia chi in Doctor siamten hoihtak in enkol toupah ua, naupangte’ condition ahoih chiang in inn paisakpan ding uhi.
2. Mental Health/Psychological Care.
Hiai naupang te’n physical leh phychological battle bangtan hiam sual ding ua, hoihtak a kep ahihkei uleh adamsung uh daih thei maimah ding hi. PTSD (Post-Traumatic Stress Disorder) neivek di un gintak-huai a, Counsellor-te’ panpihna lou in hiai apat suahtak haksa petmah ding hi.
Government in naupangte kep a poimohdan thei lawtel ahihman in Counsellor siamtakte etkolna nuai ah kikem in hoihtak in ki-enkoltou ding un agintak-huai a, Counsellor in naupangte a kep ban ah naupangte tawh kisaikha ding nu-le-pate, school a heutute leh alawm polhte uh kiang ah naupangte etkol leh kithuahpih-touh didan instruction hoihtak a pe ngei ding a, huchi in hiai naupangte’n hun bangtan hiam nung in normal life honzang theinawn ding un ka-gingta hi.
3. Spiritual Care
Hiai
bel gelh ngailou in i theivek ding...
Eilak a thiltung himaizen leh bang i chi di ua? Beidot-huai mahmah ding in gingta ing. Cave/Kawl-hawm apat hut khiak in om zenzen le uhle lungsim buaina apat i ki hunkhe ngei di un gintak huailou hi. Hiai atung a kikepna poimoh taktakte ki ngaipoimoh khollou ding in gingta ing.
Nu-le-pate bang in tate ana haitai ek mawk le ki-om ding, “Naupang thumanglou, nagam leklua a hiaiteng tuak neive, non sulungkham lua, tuban na hichih nawnlouh di. Na hichih nawn leh hon ngaihsak nawnlou ding kahi” khawng i kichihkhum zialzial di un ka gingta sim hi.
Kawlhawm sung a sawttak om ahihman un zangchiang in mangsia man hiam ahihkeileh zanmial khawng lau in hong buaisim le uh, “Bible sim inla, hoihtak in thumna nei lechin ihmuthei mai di” khawng i kichih khum mai di un ka-gingta hi. Banghiam thawm ging ziak khawng a hong kiguih in lungsim thawmhau in om le uh, “hou maimai” chi in kilimsak khollou ding hi. Mental Health Problem aneih ding khawng uh ngaihtuah bat in le ki-neilou ding hi.
Khenkhat in awlmoh in hongveh ding ua, “dam in nong tungkikthei a Pathian kiang ah kipahthu genni” chi in thumna hong neihsak ding ua…tuateng in bei mai ding hi. PTSD (Post-Traumatic Stress Disorder) chih khawng phawkphak in le omkha vetlou ding hi.
Khalam a hotdamna zaw a poimohpen mah hi, ahia khalam chouh ngaihsak a salam buaina i ngaihkhawk keileh zaw Pathian deihdan hituan khollou ding hi. Pathian Temple i hi, kha leh taksa a hoih a, i chidam tuak ding ahi. Piangthak hoih mahmah hi lele taksa leh lungsimlam a buaina i neih tamluat chiang in khalam ah leng kibahloh khazel hi.
Khalam chouh buaipih a, salam i na ngaihnep sawtluattak ziak ua khalam a kileh kiakniam daih a, i Christian hihna uhle dau gawp ahizaw diam chih khawng ngaihsut tuak kasa petmah hi.
Khanglou khong peuhmah na ni hang maw!
____________________________________________________
# Na phattuampih leh midangte khualna in WhatsApp leh Facebook chihte ah ana SHARE sawn in.
# Article ki post thakte nana muhzelna ding in hiai atung a taklampang a "Follow" kichi ana CLICK in.
No comments:
Post a Comment