THILLAMDANG MUTHEITU HIH POIMOH

Gelhtu: LB Muan

04/02/18

Mi tamtakten “Mission Field ah Pathian’ thillamdang hih muhding tampi om a, eilak ah bel huchibang thillamdang muh di om nawnlou” chisek uhi.

Ken bel Mission Field sang in ei gingtute lak ah Pathian’ thillamdang hih muhding tamzaw kachi hi. Mission Field a thumna tungtawn a gingloute kuahiam in damna hon ngah chiang a thupi kisa in kigen vengvungpah mai hi. Eilak a thumna tungtawn a damna ngah omlou ahi diam? Eite’ thumna Pathian in hon dawng ngeilou ahi diam?

Adik in genle, ei gingtuten Pathian thillamdang hih i muhtam luattak ziak uleh i muhmun luattak ziak ua bangmah lamdang kisa nawnlou ana hizaw maimah ahi. Thilteng ahi di mawng in kikoih vekta mai a, Toupa kiang a banghiam i nget chiang inle Pathian-ang ah ki-innteksak in ki-demand thoh mai ta hi. Pathian in i thumnate hon dawng a i-thumna gah i muhchiang inle ahi di mawng in kikoih a, lamdang kisa nawn vetlou hi. Pathian in i thumna tamzawte dawnna hon piak lai in i thumna khat-le-nih a dawnna i muhlouhte ziak in Pathian tung ah kivui-ut zawmahlai hi. Hiai a igen uttak bel hiai ahi…Mission Field a gingloute lak a Pathian in thumna gah khat-le-nih a muhsakte pen lamdangsa a i gengenlai a ei gingtute lak a i-thumna gah simsenglouh Pathian in hon muhsakte eiten kipahpihlou/theisiamlou/mutheilou a i-om thillamdang hizaw ahi.

Thumna tawh kisai chouh lou ah le, Pathian’ thillamdang hih simsenglouh mutheite bel ei gingtute kihi zawdaih ahi. Ei gingtuten bel Pathian diktak kithei ahihman in a nasepdan leh a thilbawl khempeuh thupidan gingloute muhtheihlouh tampitak eiten kimu in kithei hi. Khovel siamtu Toupa kithei ahihman in a thilsiam i muhte apat thillamdang gensenglouh/suutsenglouh om ahihdan kithei hi.

Houchik agen in, mit a mu-theilai, hiai laigelh sim-theilai, nui-theilai, kap-theilai, nak-theilai, ann ne-theilai, zan chiang a lupna tung a misi bang a khaw phawklou a om a, zingkal khua avak chiang a i-thou khe nawn theilai bangleng thillamdang ahi. Nasem theilai a i-om bang le thillamdang ahi…Pathian in khovel a natna-hik hichizahlai a hon kepbit bang leng thillamdang ahi. I hinna hon hawi saklai bangleng thillamdang ahi…gingtute ihih man in hiai tengteng Pathian kepna ziak ngen ahi chih i thei, huaiziakin Pathian’ thillamdang hih mu tampen ei gingtute ihi uhi.

Thildang genlou in ei taksa tung chouh en lele thillamdang gensenglouh muhding om hi. Pathian’ thillamdang hih mutheilou ihih leh bel i hinkhua ah kipahna ding tawm mahmah ding chihna ahi. I kiim-le-kiang a Pathian’ thillamdang hihte gentaklouh ei mimal tung a Pathian’ thillamdang hihte chouh suut lele kipahna a kidim gige theih ahi.

Mite’n amau hinkhua a Pathian thillamdang hihte ziak a kipahna a kidim a Pathian kiang a kipahthu a gengen lai ua, nang-le-ken i hinkhua a Pathian thillamdang hih muh di neilou, mutheilou i hikha maimah hia unau…suut sin ni…zingkal i thoh khiak apat nitak i luptan ah Pathian thillamdang hih simsenglouh muh ding om hi.

Pathian’ thillamdang hih muthei din Toupan simtute hon vualzawl hen!

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.