ISAK & REBEK

(Khuk din te nupa)

Gelhtu: LB Muan

03/04/16

Isak leh Rebek te nupa in a hinkhua uah buaina tampitak tuak uhi. Tuabang a buaina atuah hun chiang un Pathian kiang zuan pahpah sek uhi. Nupa ettontak Isak leh Rebek in Pathian kiang a zotdan uh i suutkhawm ding.

 

[1] ISAK IN BUAINA ATUAH HUN IN PATHIAN KIANG AZUAN.

Isak kum 40 aphak in Rebek tawh kiteng uhi. A ji Rebek tawh a kiten nung uh kum 20 sungvel nau neitheilou in om uhi. Hiai bang dinmun ah Isak in numei dang tungtawn a nau neih ana sawm hetlou hi. A ji in nau apaai theihna ding in mipil-misiamte kiang leng ana zuanlou hi. Isak in Pathian kiang ah a haksatna tun a, Pathian mah ana bel hi. Huchia Pathian mah a belh tinten ziak in Pathian in vualzawl a, Rebek in nau hon paai hi.

 

[2] REBEK IN BUAINA ATUAH HUN IN PATHIAN KIANG AZUAN.

Pathian in Isak thumna dawng in Rebek kum tampi gaai theilou aom chu a hong gaaita hi. Rebek in nau ahon paaita a, himahleh asung a nau omte a kisual sek ziak un theisiamlou in lungsim nuamloutak in om hi. Huai hun in Rebek in alawm-le-vualte kiang zuanlou in Pathian kiang ah a buaina genkhia hi. Rebek in a haksatna Pathian kiang atut ziak in Pathian in Rebek houpih a, asung a nau-nih om ahihdan leh nau hong piang dite maban ding hoihtak in Pathian in hilh hi.

 

THUKHITNA

Mi tamtakten buaina atuah hun chiang un a lawmte/sungte uh kiang zuan ua, Pathian sang in lawmte/sungte muangzaw uhi. “Jesu kiang gen ning” chilou in lawmte kiang ah gen zawsek uhi. Lawmte kiang a buaina gen pen a hoihlou ichi kei. Lungkhamna leh buaina lawmte kiang a i genkhiat leh lungsim hong nuam deuh hi, ahihziak in damna bel aom kei. I innkuante kiang leng zot ding mah ahi, ahihziak in ahoih pen bel Pathian kiang zot ahi. Pathian kiang a i gen leh bel Pathian in i buaina tengteng apan hon suakta sakthei a, i lunggimna teng hon hih damsakthei hi.

Mi khenkhatten lah buaina leh haksatna atuah hun chiang un Pathian kiang zot ana sawmlou in zu-inn leh khamtheih-innte ana zuan uhi. Zu-le-sa, khamtheih chituamtuam, numei-le-pasal kal a thaangtatna chih leh adangdang in a lunggimna uh hehnep sawm uhi. Tuate a kihehnep in sawt daihlou a, dakkal khat-le-nih kaan daihlou hi. Khamtheih in i lunggimna a beisak tuankei, a phatuam kei. Ban ah, i taksa hoihlai sawtlou sung in se-gai hi. Hiaite hihziak in i buaina leh haksatna lah a veng tuankei a, ei-le-ei kigawt kisuak maimah hi. Hichibang a kihehnep leh buaina hihven sawm bel Pathian deihdan hi hetlou hi.

Buaina i tuah hun in Isak leh Rebek bang in Pathian mai ah khukdin in, Pathian kiang ah i lungsim a omteng sungkhe le i thumna hon ngaihkhiaksak ngei ding hi.

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.