MUALDAWN AH KUA NA MU A?

Gelhtu: LB Muan

08/09/13

Mipilten Pathian thupidan leh hoihdan mu ua, mihai in bel mual kalzou kichi in amah hatdan leh thupidan chouh mu hi. Mipilte a kalsang zawh khop uleh Toupa thupina mu hoih semsem ua, mihai bel a kalsang zawh khop leh amah kithupisak semsem hi.

 

1. MIHAI IN MUALDAWN APAT BANGDANG MULOU IN AMAHMAH KIMU HI

Mihai mualdawn a ding bel limlang a ki-en toh kibang hi. Mualdawn apat adaksuk chiangin adinna mun sang sa mahmah hi. Midang tampite tunzohlouhna mun tung kichi in hat kisa in thupi kisa hi. Pathian thupina mulou in amah thupi kisa mahmah mai hi.

         Mihai in Pathian vualzawlna dong a, adinmun a honghoih chiang in Pathian hoihna mangngilh khapahsek hi. Pathian ziak ahi chih phawklou in amah siamna, pilna leh neih-le-lam ziaka mithupi hongsuak a, mite tung a leng hong kisa khasek hi. Amah siamtu leh vualzawltu hoihna mangngilh a, Pathian in adinsakna mun apat Pathian thupina mulou a, amah chouh hong kimuh chiang in mihai suak maimah hi.

 

2. MIPIL IN MUAL A KALMA DINMUN MANGNGILH NGEILOU

Mipil in bel a kipatna mangngilh ngeilou hi. Mual akal ma a ahinkhua, a khawsakdan leh mualtung a dingte a eendan leh thupi asak dante mangngilh ngeilou hi. “Toupan leivui apan hiaitan hontun” chi in Pathian pahtawi den hi.

 

3. MIPIL IN MUAL A KALLAI MANGNGILH NGEILOU

Mual a kallai a haksatna atuah hun a Pathian in a panpih dante, a dangtak hun a Pathian in dawn ding tui apiak dante, a gilkial hun a Pathian in nekding apiak dante, atha azoi hun a Pathian in hatna apiak dante, a lungkham hun a Pathian in a khamuan dante, “Toupa ka zou nawn kei” achih hun a Toupan a hehnep dante mangngilh ngeilou hi. Amah hatna a mual kalzou ahi kei chih kiphawk in Pathian hoihna leh vualzawlna mangngilh theilou hi.

 

4. MIPIL IN MUALDAWN AH TOUPA THUPINA MU

Mualdawn apat mipil a daksuk chiangin tuiluang kilawm taktakte, mual-le-sing hing dipdipte, vasa etlawm taktakte, huihkhisiang nung hiauhiaute leh thil tampi muthei hi. Tuate ahon muh chiangin a Siamtu Toupa thupidan hon mu in Pathian pahtawi hi. Mipil a kalsang zawh khop a, mite muh batlouh thil amuh tamzawh khop leh athil muhte tungtawn in Pathian hoihna leh thupina mukhe semsem hi.

Mualtung ah dingin, mite muh batlouh mu in, mite tung ah khawsa in, mite tung ah leng mahleh Pathian mangngilh ngeilou in Pathian thupisa semsem in “Pathian ziak a hiaitan tung ka hi” chichi mai hi.

 

THUKHITNA

Unau, nang leh kei koipen i hikha a? Mualdawn apat ei-le-ei kimupen i hi hia…ahihkeileh Honsiamtupa mu pen? Ahihkeileh “mualdawn le ka tung naikei, tung le ka tung ngeikei di” chi i hi hia leh? Tua Toupan hon tunsakna tantan ei adia Mualdawn hi phot ahi. Tua i tunna mun a Toupa i muhtheih keileh a sangzaw ah le kimuthei tuanlou ding hi...Toupa hoihna, vualzawlna leh kepnate mangngilh kei ni, Toupa lah leivui apan hiaitan a hondomsangpa ahi ngal a...

Toupan simtute hon vualjawl hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.