“JERUSALEM APAT KAWLMONGPHA IN…”

Gelhtu: LB Muan

21/08/19

Jesu in a nungzuite van a kah sandek in hiai gen malam hi...“Khasiangthou natung ua a hongtun chiang in thilhihtheihna na nei ding ua, Jerusalem ah, Judia leh Samari gam tengteng leh kawlmongpha in ka-thu theihpihte nahi ding uh” achi hi (Nasepte 1:8). Huchi in Khasiangthou piak a aom uapan Jesu nungjuite’n Tanchinhoih tangkoupihna Jerusalem ah hon pan ua, tua apat hong kithehdalh in Nungjuite lak a khat Sawltak Thoma leng AD 52 lak in India hong tungkha hi. Tangthupha paizel in eiten leng Tangthupha i ngahna kum 100 a chinna kilawmta a, kipahhuai i sa hi.

 

Pathian nasep Jerusalem a pat ding ahi…

Eite adia i Jerusalem koilak hi ding ahia...Tulai khovel ah eite adia i Jerusalem bel i innsung, i pianna gam leh khanletna mun hi mai didan ahi. Ahihleh tua i Jerusalem ah centenary bang kilawm hialta a, tua mun ah tangthupha gen ngai lailai ding mah ahi diam?

Mimal, innsung, saptuam leh khotang dinmun hoihtak in suut le, Nehemia hunlai tawh kibang chet hi. Nehemia hunlai in Israel tate’n Pathian a sukthangpaih ziak un melmate’ bawlgentheih in om ua, a dinmun uh se mahmah mai hi. A kisuanpih uh Jerusalem kulhbangte kichim a, a kongpite mei in kangsia hi. A kulhbangte uh se dimdem ahihtakman in melmate’n ut hunhun in valuh in vasubuai thei uhi, mihing kia hilou a gamsa nasan leng valut thei gige ahihman in sun-le-zan a lungmuang hetlou a khawsa ding uh chihna ahi. Tua hunlai a vaihawmna munpi (kongpi) kangsia ahihtak chiang in zattheih nawnlouh chihna ahi. Tuaziak in khotang vai a vaihawmna kichian leng omlou a, khalam-le-salam a kiakniam chihtak a ke-niam a, dinmun setak leh melmate simmoh in om uh hi.

I tulai dinmun utawh kilamdang hetlou hi. Mimal, innsung, saptuam leh khotang i etchiang in siatna uang mahmah mai a, Jerusalem bang a kichim segawp petmah chu ihi uh ahi. Thudik sang in thudiksim i paktazaw ua, thilhoih sang in ahoihsim i deihzaw uhi. Pathian’ thutak sang in a lemdeuh i ngaina zawta ua, adik leh diklou natawm khenkakthei nawnloute ihi sim maimahta uhi. Koimun peuh ah hoihna sang in siatna muh ding tamzaw a, khamiitna sang in samiitna in i kidimta uhi. Gingtu kichite lak ah belam sang in belam vulhsilh tamzaw a, Jesu nungzuihna sang in kilim bawlna i ngaihpoihmoh zawk uh suakta hi. Salam ah leng i dinmun uh siat chihtak a segawp chu ihi peuhmahta uhi. Nungak leh tangval thangtatna, nupi-papikal a buaina, tate kepna a buaina, khamtheih leh sum deihtakna ngen in i kidimta uhi. Salam buaina gensenglouh i tuahte uh ziak in achang in mahni hinna la chihkhawng zak ding tam petmahta hi.

Nehemia in a mite dinmun ngai-khawk in ann-ngawl in Toupa mai ah thum a, tua kia hilou in ami-le-sate dinmun bawlhoih ding in amahmah kisa in nasem hi. Huchi in Jerusalem kulhbang leh kongpite lamthak kik in om a, tua kia hilou in khalam dinmun puksia leng lamthaknawn in salam-le-khalam ah kitungding thaknawn uhi.

I Jerusalem ah Tangthupha honglutna kum 100 valta mahleh nasep ding goltak om hi. Pathianthu zalou leh theilouzaw omnawn khang, ahia a zuitu ding leh lungsimtak tawh Jesu nungzui kitamlou hi. Gingtu kichi in hihtheihtawp suah in Pathian adin kalsuan i kichihlai un salam-le-khalam buaina meipizing bangmai in hontuam a, tuate apat kisuut didan theilou in i pukzelzul maimah uhi. Khalam-le-salam ah i kilamthak uh ngai mahmah mai hi.

 

Ahihleh bangchi in i kilamthak thei ding ua...

Pathian in mihingte “sa-le-kha” nei a hon bawl kihi ahi. Salam abuai luatchiang in khalam leng buaiban a, khalam a buaichiang in salam leng buaigawpzel hi. Huaiziak in sa-le-kha anihtuak a achidam poimoh hi. Piangthak leh gingtu kichih ziak a salam buaina teng vengmai mawktuanlou hi. Leitung a khawsalai a, i taksa hinglai ahihman in salam a buaina tamtak leng kituaksek a, tua kia hilou in gingtu hinkhua zang i hihman in khalam ah leng bahni-le-chauh hun tampi omtham hi. Khalam chouh i buaipih leh salam ana buai ding a, salam chouh i buaipih leh leng khalam buaizel ding hi. Huaiziakin hiai tegel anih tuaktuak a buaipih ngai in a chidamtuak uh ngai hi. Sa-le-kha a chidam chiang in hin dingdantak ahing kihi pandan ahi.

Sa-le-kha a chidamtuak nading in tua i kikepdan uh a huntawk hia? Kikep didantak a kikem i hi uhia? Salam-le-khalam a i kikepdan uh leng etkik thakzel poimoh mahmah hi. Khovel a kikhek dungzui a paidan khek a poimoh leng omkha ding a, thilthak theihtuak leh ziltuak leng omkha ding hi. A poimoh mahmah nawlkhin a apoimoh hetloupi khawng buaipih maimah i hi uhia? Mimal, innsung, saptuam leh khotang a kilamthak ding i deih uleh tua i dinmun leh i panlakdan uh lungsim sengzek a suutzek ngaikha ding hi.

 

THUKHITNA

Eite’n Gospel i muhna kum 100 valta chi in i Jerusalem sang in mundang i awlmoh zawsim uh abang a, ahihziak in i Jerusalem leng buaise-gawp hita hi. Tuaziak in Jerusalem a kipat thak poimoh petmah hi. Ahuchih keileh denchiang in kawlmongpha a Tangthupha tangkoupih nadia a sawlkhetu ding kitasam ding a, a tangkoupih dia kuankhe ding leng ki-omlou khong ding hi.

Mundang, gamdang, zatdang lak a tangthupha tangkoupihna nasep leng nasatak a sepding mah ahi a, tua kawmkawm in i Jerusalem (innsung, khotaang leh saptuam) a siatnate kimuh khembawl mailou a, Nehemia bang a lamthak dia i kisak ding ahi.

Khamangthang chouh vei a, i Jerusalem a salam-le-khalam siatnate vei khalou i hihleh i khamiitna pen khamiitna diklou leh a kilembawl lel gingtu hikha ding ihi. I Jerusalem le vei in khamangthang le vei ni.

Jerusalem lamthakna leh khamangthang matna ah ken leng pan ka lasam ding nachih leh REBUILD AND RESTORE in tuabang mite tawh khut kilen a nasep khawm ut gige a, tuabang mite adin kong lianpi ahong gige hi.

Hong kisa in, nang-le-ken pan ilak keileh kuan la tuan ding ahia???

Nehemia hunlai a Jerusalem kongpi leh kulhbang a lamthak hun un mipite pangkhawm vek uhi. Innkuan-kuan in, siampulian-le-neu, dangka-eng-sekmite, gimlimbawl mite, vaihawmtute, azawng-ahau leh numeite nasan pang in amau bawl dia kigen chiat nasatak in bawl uhi. Huchi in ni 52 sung in bawlzou uhi.

Jerusalem lamthaktu a pang ding nahi hia ahihkeileh Sanballat leh akaihzatamte dan a gensetu leh mi suthadahtu in?

I melmate apat i Jerusalem abit keileh Kawlmongpha a i nasepna leng pai hat theilou ding hi. I Jerusalem le lamthak ni, kawlmongpha inle Tangthupha genzak ni.

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.