ADIK CHU “DIK” CHIH A, DIKLOU CHU “DIKLOU” CHIH-NGAM DING AHI.

Gelhtu: LB Muan

24/11/18

23th Nov.18 in kiteenna khat ahoh ding in kakisa a, Metro Station tan Sharing Auto in katuangtou hi. Sharing Auto a katuanlai in Auto hekpa’n a utdandan in hon hekkawi zotzot a, kim-le-kiang a gari dangte adi khual hetlou in hon taipih zotzot mai hi. Keile kaki nawhsim mahmah a, Metro Station tungbaih ut kahihman in Auto-pupa gari hekdan soisel hetlou in dai dide in katuang hi.

Huchihlaitak in kalungsim ah…ken gari kahek hun a Sharing Auto-te kiang khawng a katai khak chiang a Auto hekte’n tha-khat thuthu a Auto hon hekkawi ua, brake khawng hon man phutphut ua, utna munmun ahon khawlmawk chiang ua kiphukha dekdek sek a, achang a Auto hekte hihkhelh ziak a aki accident khak dekdek hunte kon ngaihtuah khia a, gari ka hek chiang a Auto hekte hekdan hoihsa hetlou a thangpai deuh gige kahihdan kaphawksuah hi.

Ken lampi a gari ka hek chiang a Auto-pute iplah mahmah hi-ing a, Auto a katuan chiang a katunbaihna ding ahih nakleh Auto hekte hekdandan hoih kasak zelpen thildik ahihlouhdan kahon musuah hi. Kei phattuam nadi ahihleh “DIK” chi a, kei man nadi leh kei adia hoihlou ahihleh “DIKLOU” kachih mawkpen thildik hilou a, Bible dan tawh leng kituaklou hi ahi.

Thil banghiam ei hoihsaklouhte “HOIHLOU” chimawk a, en hoih i sakte “HOIH” chi hiam ahihkeileh ei man nading ahihleh “DIKLOU” chi a, ei adia punna ding ahihleh “DIK” i chihmawk leh Pathian in honsiamtan tuanhetlou ding hi. 

Mi kuahiam i sungkuan, tanau, lawm, theih ngei, hon panpihkha, i phattuampih khak, maban a hon panpih dia lam-et chihdan khawng ahihleh adiklouhna ah leng sihgup in kigumsuk maimah hi. “Bible in bang agen a? Pathian in bang chi’n a ngai diam?” chihlam ngaihtuah khak in kineilou a, adiklou leh hoihloupi bang leng kidiksak sawm a, adik zenpi leng kidiklousak maimah hi.

Tulai khovel ah adik leh diklou tehna din Bible kizang nawn talou a, mihingten “dik” i chih pen Bible in “diklou” achih lehleng adikdan in kipomsuk maita hi…eiten Bible thugen zui zawlou in Bible i kaihtaalthoh zawta uhi…

Gingtu diktak i kichih leh adik chu “DIK” chih a, adiklou chu “DIKLOU” chih-ngam ding ahi. adiklou “DIK” chi a adik lah “DIKLOU” chi i hihleh Jesu a i dinmun kiveelthak kuul mahmah khading hi.

Isai:5:20 “Thil hoihlou thil hoih chi a, thil hoih lah thil hoihlou chizel a, vak mial a ngai a, mial vak a ngaisek a, thil khum thil kha a ngai a, thil kha thil khum a ngaisekte a tung uh agik hi!”

 

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.