I PULPIT I ZANG HIA?

Gelhtu: LB Muan

07/02/18

            Kum bangzah hiam paita in nikhat chu ka seppihte khat in “Evening Class le kipan nawn dekta di ahi a, eitegel inle class i lak ngai ding” hon chi hi. Regular student-te bel suun chiang in kai uh a, thohtanni apat ziltawpni tan hoihtak in class nei den uhi. Sepna nei lah Bible zil-ut, suun a kai manloute adin evening class kibawlsak a, evening class bel kalkhat a nitak nih khawng lel class ki-neizel hi.

            Suun a kaite bel a tamzaw tuailai ngen hi uh a, kei sang a upa zaw leh nupi-le-papi tamlou uhi. Evening class dia hongkuante bel upa thei mahmah mai ua, tal-kolh pipi khawng ahihman un kei a tate uh vual leh tangvallai in amaute ka sinsak ding aguk in kana lin tuntun mai hi.

            Evening class student-te bel a upat kia uh hilou a, Company a Manager khawng, Nurse khawng leh sepna lian pipi nei ngen khawng ahihman un hu-phulh-huai uh ka nasa tuntun hi. Suun chiang a class nih/thum khawng kaan la ngeilou ka hihman in gim-le-tawl suanlam di himhim a om kei hi. Suun a gim hita zenzen leng le evening class kei lak di class khat chouh (minute 45) la peihlou hial di bel kihi samlou ahihchiang in suanlam di mawngmawng ka neikei hi.

            Class patni di hongtung petmahta a, gari hoih pipi khawng in hongkuan ziahziah uhi. Evening class la din class ah kong lutta a, ka student-ten dingkawm in honna welcome ua…amau ka-et chiang in ka-hu bang asam theisim maimah hi. “Sir” hon chihchiang bang un ka kiguihthei simsim a, suun a class lak tawh kikhai kasa mahmah hi. Upa theilua ahihchiang un assignment piak ding bang leng ka kisuanglah hialsek hi. Amau bel laisiam pipi leh sepna lian pipi nei ahihman un polite in kamsiamthei zawmah uhi.

            Hiai a kagen ut tak bel ka class lak dan hizawlou in bangziak a hiai upa pipi leh sepna lian pipi nei ten B.Th (Bachelor of Theology) leh M.Div (Master of Divinity) zilthak nawn mawk uhiam chih ahi. Hun neilou pipi a Bible zildia hong kisak khiak pen uh thupi kasa petmah hi. Tuasang a thupizaw chu a Pulpit uh atheih mahmah uh thupi kasa hi.

            Amauten upat nung a Bible hong zilkik nasan uh bel a sepna mun ua gingloute kiang a Pathianthu agen ut ziak uh hi ahi. Amauten asepna mun uh, a pulpit uh ahi chih thei hoih mahmah ua, tua thupi kasa petmah hi.

            Pathian nasep chihpen full-time a semdia kipekhia leh khaloh piak a Pathian nasemte kia sepdin akoih kei ua, amau mahmah kisa in alawm-le-vualte uh Pathian kiang a pilut sawm in nasatak in panla uhi. Pathianthu theihbeh utna in kidim ua, tuaziaktak a Bible hong zil ahi uhi. Class lak hun ma in hongtung tangpi ua, upa thei mahmah leh suun a gimtak a office kaikhin himahle uh class laklai a lusu chih leng om mawngmawnglou uhi. Hiaite kipiak zawhna thupi in ettontak petmah hi.

            Amau mahmah leng khamangthang mat na a akizat ban uah sum-le-pai ah leng kipezou petmah zel uhi. Panpihna sum apiak chiang un amau pen adongtu sang in kipak zawsek uhi. Thil apiak chiang un receipt a omna khel-khelte ah piak sawmlou ua, mite theih di poimoh a saklouh ban uah piakkhiak pen vualzawlna ahi chih thei hoih mahmah ua, kiphal petmah uhi.

            Eilam tetawh tehkak zual le. Eilamten bel khamangthang mat pen Pastor, Missionary leh Evangelist ahihkeileh full-time a Pathian nasem dia kipekhete chouh nasep din kikoih mai hi. Adangten khamangthang mat kisawmlou maimah hi. Private leh Solkar nasemte adia i Pulpit bel i sepna mun hi ahi. Ahia eiten i pulpit ah i nek muhna di chouh ki ngaihtuah a, Pathianthu kigen sawm mawngmawnglou hi. Pathian in pulpit hon pechiat a, tuapen ki ngaihsak khalou hi.

            Eiten sepna i neih a, sawm-a-khat i piak leh sepdi teng zoudan in i kikoihpah mai uhi. Pathian in pulpit hon piakna (i sepna mun) a Pathianthu tangkoupih sang in saptuam khawng a kizat a biakinn sung a heutu/vaihawmtu hih khawng i utzawk uh hi maimah hi. Sum-le-pai i thoh chiang in lah miteng mai ah i thoh ut se a, i piak chiang inle piak a kipahna chihte i neikei ua, minhoih nadi leh mite pahtak i loh nadi a i piak ziak in Pathian vualzawlna i dong theikei uhi. Ka evening class student-te tawh chu kikhiat in om kasa petmah hi.

            Unaute, i pulpit koitak ahi hiam? I omna leh sepna a tuam dungzui in Pathian in pulpit honpiak na mun tuam ahi. Pathian in pulpit hon bawlsakna mun ah Pathianthu i tangkoupih khata hia? Khenkhat adin i pulpit i sepna mun ahi ding a, khetkhat adin i mehzuakna mun leng hikha ding hi. Khenkhat adin i pulpit i laizilna mun hikha ding a, khenkhat adin i kimawlna mun leng hikha ding hi. I pulpit i thei na hia? I pulpit ap-zen a koih a, tuamun a Pathianthu tangkoupih khalou i hi hia?

            Toupa kiang i tunchiang in khovel a i thupidan, i neih-le-lamte, i nek-le-dawnte, nawp i sakdan leh haksatna i tuahte hon dong kha khollou ding a…Pulpit ahon piakna mun apat khamangthang bangzah Pathian ang ah i pilut a chih hon dotpen hiding in gintak-huai hi.

            Unau, i pulpit zatdan siam in a manpha theipen a zang ding in Pathian in hon vualzawl chiat hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.