ITNA MASA

Gelhtu: LB Muan

24/08/14

Nupa kiteenna asawt deuhdeuh leh ki-itna dau deuhdeuh. Innkuansung ahle i piching deuhdeuh leh itna piching deuhdeuh zawlou in itna tawm hiai-hiai. Khalam dinmun ahle i pianthakna asawt deuhdeuh aleh khalam a piching deuhdeuh zawlou in aminpu maimai a Pathian bia suak maimah…hiaibang dinmun bangziak a tung i hihiam ichih leh ‘itna masa’ i mansuahtak ziak ana himaimah ahi. Hiai ‘itna masa’ kichi bang hihiam chih i suut ding…

 

[1] NUPAKAL A ITNA MASA

Nupakal a ‘itna masa’ bang hiding hiam?

I hun mualliamsate ah i lutkik zual ding…I kimuh leh kitheih tuung a i kizahtak tuah a, i lungsim a “hiaibang kei adi himaizen leh aw" ichih vungvunglai nite, laithon hiam ahihkeileh lawmte tungtawn a itna-thu i genlai nite, zumpipi leh siamloupipi a itna-thu i genkhiaklai hunte, itna i kisaantuah a nui hiauhiau a lampi a i kizuihlai nite, midang adia kiphal mahmahlou a “Nanglou in gamgua bang hingzou kei ning” chi a khut i kilet tentanlai nite, kimulou a i om zawhlouh a, zansawt pipi tu-khawm a mabaan ding i kikuplai nite, kikhelah pipi a mundang khawng a kizinsan a laithon/sms khawng kikhak a, achang a mittui pawt nilh-nelh a phone khawng a kihoulai nite, laithon i muh chiang a mitphelou zen a i simtuan zihzehlai hunte, bazaar i kaina munte a thilhoih i muhte mantam lehle lei teitei a i kipiaklai nite, nu-le-paten hon-hal mahle uh “Phamdong khenlou ding” chi a i pan tentanlai nite, tung solkha taang singseng nuai a itna-thu i suutkhawmlai hunte, i hoihlouhnate sang a i hoihnate i kimuhtheih zawklai nite, i hoihlouhna tengtawh i ki-itlai nite…“kon sukhase kei ding, na mittui nulhultu in kapang ding, ittak in kon kem ding” chi a i kichiamlai nite, Pastorpa leh mipi mai a “Nawpni-le-dahni, anuam-le-haksa ah…” chi a i kichiamlai hunte a i ki-itna pen ahi itna masa.

I lungsim ngaihtuahna tomchik khawlsak zual in, hun paisa suutkik zualle…hun paisa a i hindan leh omdante, i kampau zatte, i kichiamnate suutkik detdet in hiai atung ate ngaihtuahkik sinle ‘itna masa’ kichi bang hihiam chih i theisuah ngei ding.

‘itna masa’ pen mangsak kha a i koppihte su-gentheilua i hita maithei, “Kitenglou di pi kiteng kha” chi a kisiik vungvung le i hikha maithei, “Hichibang a hinkhua zang dia kigingta hetlou hi ing a” chi maimah le i hikhathei, i koppihte itzou nawnlou a i kichiamnate phawk nawnlou le i hikha maithei…‘itna masa’ ineih nawnlouh ziak a i koppihte toh i kaal segawp le ahita maithei…

‘itna masa’ neihkik sawm in i koppihte i ‘itna masa’ piak nawn sawm ni. Tua ah nupakal kituah na omding a, Toupa deihdan leng hi ahi.  

 

[2] INNKUANSUNG A ITNA MASA

Innkuansung a ‘itna masa’ bang hiding hiam?

Buhbel khat a nute’ aanhuan i nekkhawm lai nite, sanggamte tawh i kitengta-neih a i kimawl khawmlai nite, asia-apha kikum a milak a i hoihlouh-le-diklouhna munte nasan a i kiguplai nite, milak a U-te i-suan mahmahlai leh naute i-duat mahmahlai hunte, Nu-le-Pa’ thuhilhna i zuih khawm nainailai nite, school kai di kuankhawm a nitak chiang a laisim khawmlai hunte, Pathianni chiang a khut kileen a Biakinn lam innkuan a i zotkhawmlai hunte, innkuan kim a Christmas i zatkhawm a kuangpi a ann i nekkhawmlai hunte, Nu-le-Paten vanthak hon leisak hun ua “Nu, Pa, kakipak” ichih theihlai nite, Nu-le-Pate inn hongtun haksim chiang ua omtheilou a gate bul a i dak-daklai hunte, “Ka let chiang in ka nu-le-pa nuamsatak in ka omsak ding” chih ngaihsutna i neihlai nite, nu-le-paten kho-ul kai niip-niap a tate a vaklai hunte, school fee pezoulou a tate exam theihna dia school neitute mai a ava kuunlai hunte uh, silhpuan hoih leng baat ngamlou a tate a etkol touhlai nite uh, a lim-le-al leng ne-ngamlou a guhtuikang zen a tate adia apanlai nite uh pen innkuan sung a ‘itna masa’ a omlai nite anahi ahi.

I hun mualliamsate suutkik zual in tua i dinmun tawh tehkak zualle…I innsung ah ‘itna masa’ omlaimah ahi hia? Sungkuante adia ‘itna masa’ neilai mah ihi diam? ‘itna masa’ nei nawnlou a, neulai a i nu-le-paten unau ki-ittuah ding thu honhilhte uh mangngilh a unau kal susetu suakkha i himaimah hia…koppih i neihnung a nu-le-pa leh sanggamte phawkkha nawnlou i himaimah hia…sepna lianpi nei a khaloh tampi sang a noptaal gawp a gentheitak a hon chawmtu i nu-le-pa mangngilh maimah i hi hia…neulai a adung-le-vai a i kizuihpih, school i kuanpih, aankuang khat i sawkpih leh zan a i giahpih i sanggamte’ itna phawkkha nawnlou a khawsa i hi maimahta hia…I ‘itna masa’ koilam tungsak i hita a? ‘itna masa’ neihkik sawm ni. A kikhelma in i nu-le-pa, pianpih sanggamte ‘itna masa’ piaksawm nawn ni.

 

[3] PATHIAN TAWH KAL A ITNA MASA

Pathian tawh kal a ‘itna masa’ bang hiding hiam?

Pathian i ‘itna masa’ bangchik apat hong kipan hiam chih suut masa zualle…Kalvari Sing Khros a Nazareth Jesu ei khelhna ziak a si ahi chih i pom a, Jesu hondampa dia i sanni pen ‘itna masa’ Pathian i piak ni ahi.

Toupa’ hotdamna ziak a kipahna mittui aluanlai nite, mitkha a Jesu chouh i muhtheihlai nite, salam-aan i lunggulh bang a khalam-ann lunggulh a niteng a Laisiangthou i simlai nite, zing-le-nitak a Toupa i houpihlai nite, Pathian’ aw zak nadia i hun i piakkhiaklai nite, lam kapial khadi chi a Jesu lamkaihna i nget ngutngutlai nite, i kam a thupawt mite’ adia khum mahmah a, i ngaihtuahnate asian mahmahlai hunte, Biakinn i zotchiang a Laisiangthou i khut a i tawilai hunte, kikhop nite a ann ne-pah a kikhawm dia i kuanpahlai nite, “Pathian adin ka damsung hunteng zang ning” chi a i kichiamlai nite, pulpit a kigente Pathian apan mahmah ahi chi a i kipah theihlai nite, Pathian phatna late sa a i mittui apawt theih hunlai nite, i seppeuh a kipak leh lungkim a i omlai nite, miten ei a Jesu mel amuh theihlai nite, khovel nop-taal nate sang a vaan agou delh a i kalsuanlai hunte, khovel thupi nate sang a vanlam thute suut a hun i zatlai nite, Pathian suk-heh khak di lau a i kalsuan i ki veen mahmahlai hunte, Jesu tawh ton hel-hel a hun i zatlai nite pen i ‘itna masa’ Toupa i piaklai hun ana hi ahi.

Tua hun tawh tulai a i hinkhua tehkak le, Pathian i ‘itna masa’ pelai i hihia ahihkeileh mangthang gawpta i hizaw hia chih ichiang mahmah ding. Toupan i ‘itna masa’ ahi hon nget. Toupa ihih lungkim ut aleh bel i ‘itna masa’ piak ding ahi. 

 

THUKHITNA

Salam a it dite hi in khalam a it dite hitaleh kuamah itzou nawnlou. Mahni-le-mahni nasan ki-it thei nawnlou mitamtak ki-omta mawk hi. Hiaibang dinmun ading mi kitamta mahmah a, a kikhel luatma a i khanloh keileh maban a siatna lianpi nupakal ah, unau-kal ah, innkuansung ah, ngaihzawng tetawh kal ah, lawmte tawh kal ah leh Pathian tawh i kal ah hongtung ding hi.

Nupakal, innkuansung leh Pathian tawh i kal hitaleh, ‘itna masa’ neihtheih nawnna ding in hiai dotnate poimoh ngaihding ahi…‘itna masa’ pen bangchik apat nei nawnlou? Bangziak a nei nawnlou? Bangchi leh neinawn thei ding? ‘itna masa’ ei apat aman hun leh aman naziakte suikhiak a ‘itna masa’ neihnawn nadia pan nasatak a lak ding ahi.

(Himahleh hiai thu ah demna kon nei hi; na itna masapen na tawpsan thu ah. Huaiziakin na pukna laitak theigige inla, kisik inla, na thilhih masapente hih nawn in; huchilouin zaw na kiangah ka hongpai dia, a om na kipanin na tuikuang koihna ka suan ding, na kisik kei leh…Kilakna 2:4,5)

Lawmte tawh kal ah, ngaihzawngte tawh kal ah, innsung ah, nupakal ah, Pathian tawh kal ah ‘itna masa’ neithei nawn ding in simtute Toupan hon vualzawl hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.