Gelhtu: LB Muan
07/10/13
Hun tampi ah i mi hinpihte sang a tungnungzaw in i kikoih khasek hi. I kipilsak a, midangte hai bang i sasek. Achang in thil i kitheisak a, midangte bangmah theilou bang in i bawl khasek. Achang in i ki-mihoihsak mahmah a, midangte niin bang mai in i mu...Ahia, Pathian siamsa mihingte a ki-simmoh leh ki-musit di kuamah ki omlou hi!
PIL NALAM KIBANGLOU
Khenkhat mi taangpi sang a piltuam deuh bel om uhi. Ahihziak in mipil i chihte le ahai nalam uh ana omthou sam a, thilbangkim ah ana pilvek tuanlou uhi. Solomon mipilpen a kigenpa na-ngawn in leng ahoih loulam a jite thumang a Pathian deihlouh lampi ana zui maimah hi. Solomon inle hai nalam nei ahi chi le genkhial kholkei ni.
Mihai a i-koih ten leng pil mahmah nalam ana neizel uhi. Ei theihlouh atheih uh om a, i gintak louh pipi bang leng ana thei in hihthei mawk uhi. A pil nalam uh midang adia phatuam di ana hikholkei mahleh pil mahmah nalam bel nei uhi. Mihai dan a i-koih khenkhat bang Pathian lau mahmah chih bang leng om hi. Huchibang mite chu Solomon sang in pilzawk nalam nei ahi uh chile genkhial din i ki-gingta kei.
Tua
ahihman in a ki-simmoh di om khang!
SIAM NALAM KIBANGLOU
Pathian in mihingte talent tuamtuam honpia hi. A khente lasaksiam, sumdawnsiam, music siam, kimawlsiam, laisiam, thugensiam, milem gelhsiam leh adangdang...Pathian in siamna hon piak dan kibang lou hi.
Siam nalam kinei chiat hi. Tehkhin nadin, lasiam minthang kua hiam football peksak le goal a khum di chu van agah i chihte bangkha ding hi. Tuabang mahin Football peksiam chia i ngaihsang mahmah khat lasa din stage ah dingsak le, a lasak belam-haam hong bang khathei hi. Tua ahihman in banglam hiam a mite sang a siamzaw i hihtak leh leng kithupisak nadi ana om hetlou hi. I hih theihlouh khovel ah thiltamtak om ding hi. Midang tampiten awlsamtak a ahih uh en ihih theih hetlouh chihbang tamlua ahihman in mahni ki-ngaihsang luatlouh pen thilhoih hi ding hi.
Tua
ahihman in a ki-simmoh di om khang!
HOIH NALAM KIBANGLOU
Mi khenkhat thil theisiam mahmah lah midang panpih siam hetlou chihle omzel hi. Khenkhat lah mipanpih siam-a-siam mai ahihziak a inn a sungten thil banghiam hihdia sawl zoulou chih bang leng om thepthup zel hi. Mi khenkhat thilphal mahmah ahihhang a lungtom petmah chih leng om uhi. Khenkhat lah inn a hoih mahmah, pawlam a hoih hetlou. Khenkhat lah inn a hoih hetlou pi pawlam mite lak a zaidam mahmah chih bangle omzel.
Mihingte i hoihdan tuamchiat hi. Mihoih mahmah leng a hoihlouh nalam ana omthousam hi. Munkhat a hoih a, mundang a sia chih bang leng mitampi om hi. Mihoih hetlou i chih bang leng kua hiam adia ana hoih petmah hikhathei...Banglam hiam a i-hoih ziak in midangte simmoh kei ni, ei sang a ahoih zawkna uh tam khading hi.
Tua
ahihman in a ki-simmoh di om khang!
THEIH NALAM KIBANGLOU
Kua hiam khawpi a om chia thilthei mahmah kisa pen singtang ah vahoh leh a theihlouh tampi om ding hi. Lou khohdan, vasa leh ganhing min tuamtuamte, gamvakdan, buhtuhdan, mangtomdan, pu-le-pa tawndan leh adangdang a theihlouh tampetmah omding...tua mahbang in singtang a pil kisa mahmah kuahiam khawpi zin ngeilou khat khawpi ah zin leh mihai bang ding hi. Amah adin lei-nuai a Metro tai bang le thilmak mahmah hi ding a, ATM apat sum lakkhiak bangleng maktak hi ding hi. A lungsim buaisakzou ding thiltampi mu din gintak-huai hi...Banghiam lam thil itheih ziak in bangkimthei dan in kikoih kei ni. I theihlouh khovel ah tam law mahmah hi.
Tua
ahihman in a ki-simmoh di om khang!
HAUH NALAM KIBANGLOU
Khenkhatte neih-le-lam hau mahmah in kuamah englou uhi. Mit a hoih asak peuhmah uh neizou in khovel ah lunggulh luat di neilou uhi. Ahihziak in huchibang a nuamsa khenkhat a dahni hiam hun ua ittu ding khat le neilou chihbang leng omtham hi. Khenkhat hausa mahmah lah beh-le-phung, tanau neitam khollou chihbang leng om hi. Khenkhat khovel neih-le-lam hau mahmah lah khalam a zawng mahmah chihleng om tham uhi. Mi khenkhat bangmah nei khollou lah khalam a hausa mahmah, sum-le-pai nei hetlou lah ittu ding tanau-laina hau mahmah chih bang leng omzel hi. Sum-le-pai hau, tanau hau ihih khak tak leh leng ki-thupisak nadi omlou hi, zankhat thu a leivuisuak theite hi hang, koi mun hiam a kuamah kepbatlouh a vakvaitak ale omtheih luat ahi.
Tua
ahihman in a ki-simmoh di om khang!
THUKHITNA
Mi
khenkhatte ki-mihoihsak, kipilsak, kisiamsak, kihausak, kihoihsak in midangte
bangmah a mu khollou chihbang omtham hi. Pathian in hon vualzawlna eiten
ki-phatsakna leh i mi-hinpihte simmohna a i-zat ding hi-hetlou hi. Honpetu
Pathian in a ut hunhun a lakikthei ahi chih mangngilh kei ni. Nikhat, zankhat
thu a vaivutsuak theite i hi. Piangsual kikhellou, a haute hau gigelou, a lalte
lal gigelou chihte mangngilh kei ni Unau!
____________________________________________________
# Na phattuampih leh midangte khualna in WhatsApp leh Facebook chihte ah ana SHARE sawn in.
# Article ki post thakte nana muhzelna ding in hiai atung a taklampang a "Follow" kichi ana CLICK in.
No comments:
Post a Comment