‘EI-LE-EI’ KIPANPIH

Gelhtu: LB Muan

29/10/13

Pathian in mihing asiam in ganhingte banglou in Ama’ batpih in siam hi (Gen.1:27). Lauhuaitak-le-lamdangpi a honsiam kihi ahi (Ps.139:14). Tua ahihman in mihingte ganhing banglou in kichituam mahmah a, i lungsim kizang in ganhingte tung ah vai kihawm in kikhawsa hi. Ngaihtuah theihna, deihteel theihna, anuam-le-haksa, ahoih-le-hoihlou theihkak theihna ki nei hi. Huchi in Pathian in i utdan leh deihdan a nungta ding in hon khahkol a, ei-le-ei ki enkol a khawsa ding in zaleenna leng hon pia hi.

[1] LUNGGIMNA I TUAH HUN IN ‘EI-LE-EI’ I KI-HEHNEMTHEI

“Haksatna, gentheihna, mangbatna kei tuahteng tuak lechin nang leng nalunggim law ding” chihpen mitamtakte gen ahi…ahihziak in tuabang a lunggim nadi thil i tuah hun in leng ei-le-ei ki-hehnem in i lunggimna apan suahtak theihdan ana om law mahmah hi. Ei pen in i lunggimna i kizawhsak a, i suahtak utlouhsek ziak a, i lunggimna in hon tuamgawpsek hizaw ahi.

‘Jesu kiang gen ning, Jesu kiang gen ning’ i chi a, i gen khit nung chiang a le i lunggimdan ngei a lunggim ihih laileh bel Jesu ah ki-nga taktaklou leng kihi khading hi. Setan in mihingte lunggim a om gige in ki-ngaise le chihpen deih mahmah hi. “Khovel a i om sung in lunggim nadi tuamtuam tampi om ding mah ahi” chi in ei-le-ei kihehnem in lunggim ding in kiphal kei ni…Pathian-hing neite hi hang!

 

[2] KHALAM BAH I KISAK LEH ‘EI-LE-EI’ IN I HATNA DI I KI-NGAIHTUAHTHEI

“Khalam ka bahlua, bangchi ding ka hia?” chi a buai mitamtak om hi. Ahia, hichibang a buaite bel khalam khan nadia bang hih ding ahia chih theiloute hilou in khalam khan sawmloute ana hizaw daihsek uh hi.

Gil a kial chiang in an hiam, nektheih hiam i nek leh kivah ahi chih atheilou mi khovel ah om din agintak huai kei. Gil a kial leh nek ding i zongpah, i dang atak leh tui i zongpah. Huai mahbang in khalam a bah i kichih leh chu khalam an nekding zawnpah mai ding ahi. Niteng a Bible sim a thumna neih a Toupa toh hunzat pen in khalam ah hon hatsak ahi chih atheilou ki omlou ding hi, i peih kei a ahi zaw.

Gilkial chih kithei a, nek ding nei a nepeihlou chu kialtaak mah ahi. Niin chih kithei a kisil peihlou chu niin dending mah ahi. Huaiziak in khalam bah i kisak leh i Bible sim a niteng a Toupa toh hunzat ding ahi.

 

[3] BUAINA I TUAH LEH ‘EI-LE-EI’ IN I BUAINA I KI-HIHVENGTHEI

Khovel ah buaina tuaklou kuamah aom kei…a khente’n buaina neuchik atuah pen uh a hihven sawmlouh ziak un buaina lianpi neihloh chihbang leng omtham hi. Mi khenkhatte’n buaina atuah chiang un amau chouh buaina tuak mah bang uh a, a buaina uh hihveng sawmlou in paw kenkun mai uhi.

Buaina i tuah leh ahihveng theitu ei-mah i hi. Buaina thuktak ahihtak aleh leng i suahtak nadi lampi maths i khuatdan a khuat-a-khuatkhiat sawm mai ding ahi. Buaina kizawhsak ding hilou in akin theilam a hihveng sawm ding hizaw ahi. Aven baih leh lungsim nuambaih ding chihna ahihman in a lampi ding zawn mengmeng hoihpen hi.

Tehkhinna din, Gammaang lak a mang i hihleh “ka mang” chi in i manna mun ah i om den mawk kei, i khawdak a, lampi i zong a, hunchi in i paipai leh khua i tungzel mai…huaiziak in buaina, haksatna leh mangbatna tawpkhawk tuak i hihtak aleh leng aven nadi lampi kintak a ngaihtuahpah ding ahi.

 

THUKHITNA

Pathian’ panpihna leh midangte panpihna i poimoh kei chi i hi-zenzen kei. Ei-le-ei i kipanpih sawm keileh midangte panpihna in bangtan mah hon tunlou ding hi. Pathian in hon panpih theihna ding in leng ei-le-ei i kipanpih masak kuul hi. En i hih theihtan om a, tua i hih theihtan i hihkhit chiang in Pathian in abaan hon hihsak theipan hi.

Tehkhinna din, tuikul ah i kia a, hon panpihtu dite’n hon kaih khiakna di un khau-hual hon khaksuk pen uh i na mat ut kei leh bel hon panpih sawmten hon kai khethei ngeilou ding uh chihna ahi. Abul tuung a i gen bang in Pathian in zaleenna leh deihtel theihna hon piak ziak in bangkim ah thupukna ei-le-ei i kilak ngai a, Pathian in hon laksak mawklou ahi. Tua ahihman in Pathian in mahni-leh-mahni kipanpihte chouh panpihthei hi.

Simtute ‘ei-le-ei’ kipanpih a midangte tanpha panpihtu hi thei ding in Toupan hon vualzawl chiat hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.