NAGAM ADIA THUAK TAAK IN NON SIM A, KAKIPAK

Gelhtu: LB Muan

30/03/16

 

2005 kum a April ni 10, bel kei ading in ni manpha dan in kasim mai hi. Hiai nitak a ka thiltuah ka ngaihtuah kik chiang in kipahna in kadim a, “Toupa nagam adia thuak taak in non sim a kakipak” ka chilou theikei. Hon soisa tute le ka mawhsa kei, Pathian in a khelhna uh ngaihdam a hotdamna hon neihna ding un ka thumsakzaw hi.

Jammu & Kashmir a Kathua khua ahi. Pathianni ahi a, nidang bang in kikhopna zinglam dak 10 in ka pan ua, dak 12:30 khawng in kazou uhi. Kikhop khit in ka tawldam a huaikhit in lunch ka ne hi. Nitak dak 5 lakvel di ahih in ka lawmpa Akinchan (Chhatisgarh te) tawh saptuam memberte lak a khat damlou veh ding in ka kuankhia uhi.

Ka damlou veh dekte uh inn bel minute 30 tawh dakkal 1 kikal khawng khe in pai ngai hi. Kou leng ka Bible uleh Labu tawi in ka kuan ua sawtkuamtak kapai nung un ka hoh dekna inn uh ka tung uhi. Ka damlou veh di pen uh ‘Poonam’ bel lupna ah ana om a, huchin a naunu leh anu leng hong paikhawm ua kikhopna ka nei uhi.

Hiaite innkuan bel Khristian hong suakthak ahi ua, himahleh anu-le-pa uh bel huchitel in ginna lam ah det nailou uhi. A naupa uh sepaih officer ahi a, amah leng piangthak nailou ahi. Damlou nu naunu ‘Shema’ in bel Pathian ah ginna kiptak nei a amah ziak a asungten leng Pathian lam hon naih uh hidan ahi. Vaite adia namsangte ahihban uah hausa in changkang mahmah uhi.

Poonam damlouhna bel Doctor ten leng theikhe zoulou uh a, kum tampi lupna ngak hita hi. A damlouhna apan damsiangna hon ngah leh chu a innkuan un gingtu diktak hong hi vek ding ua lam-etna om a, huaiziak in kava thumsak gige sek uhi. Poonam bel kum 25 lak di vel hi a, laisiam, fel leh melhoih mahmah ahi. Ahihziakin a damlouhna in bangmah semtheilou in lupna ngaksakden maimah a, hehpih-huai petmah hi. Ka vahoh chiang un kipak thei mahmah a, Pathian thu i hilhte bang hoihtaktak in ngaikhezel hi.

Hiai ni inle laa khawng kasa khawm ua, Pathian thu a kaki haanthon khit un thumna ka neihsak uhi. Tuate khit in singpi dawn kawm in kaki houlim zeklai ua, huai zawh in ka lawmpa toh innlam zuan ding in kong pawtkhe nawnta uhi. 

Innlam paina ding in lampi nih om a, khat pen in bazaar lak tawnkha a, khat pen in bel bazaar tawn khalou hi. Nitak dak 8 leh chih lakvel ding khawng ahihtak man in mi tamna lam kitawn leh lauhhuai louzaw ding a, ki bitzaw ding chi in bazaar lam kon tawnta uhi.

Sawt simtak kapai nung ua bazaar kaphak dektak un ka nunglam ua pat Bike khat hongtai in ka kiang chet uah hong khawl a, Bike apat pasal nih hong kum in hon mattang sawmta mawk uhi. Huchih laitak in lam ning a om Papi khat in honna panpih a bangbang hiam agen tak in huai pasal tegel in hon ki nung lehsan thak uhi.

Koule honna panpih di om chi in kipaktak in inlam ka zuan nawn uhi. Bazaar laitak a i paileh sotlou chik in inn kitung thei a, lauh leng lauhhuai louzaw chi in Bazaar lai kon tawn uhi. Mipi tamtakte bazaar kailai ahihman un ka thawmhauna uh abei deuh a kalung uh amuang deuhta hi.

Bangtan hiam nung in thakhat thu in ka kiang uah gari neu 3 in hon uum kual maimahta hi. Denlam a hon khoih dek tegel in ma hon kaai ua, a lawmte pasal ngen tawh hon uum kualta mai uhi. Mi 6 tak ahi ua, tai mawk didan lampi leng om nawnlou, gari a hong kum utoh kiton in a khutthak siakna di un hon zangta mai uhi.

Mipi tampi hong ki punkhawm ua, mipite kiang ah “Hiai ten mi force a Khristian suaksak ahi uh” chi in gen ua, koule “Force a kuamah Khristian suaksaklou kahi uh kachi ua” mipi huchizah lai ah hon panpih ding kuamah aom kei hi. A hon vuakna mun uh kiang ah vaite biakbuk lianlou khat om a, khat in ka ngawng a hon sawn in avai pathian uh hon biaksak sawm mahleh Pathian panpihna ziak in hon besakzou tuan kei hi.

Ka puanak teng lah kekzak khin, a hon khoih dandan uh chu thuak di himai chi in kaki dawh mai uhi. “Ka nu mel mukha nawnlou di kahita mai di maw” chi in ka lungsim ah ka nu-le-pa hong lian mahmah uhi. Lungsim bel paisau mahmah in hon khoihna uh anat lam leng kiphawklou zawzen hi.

Hon khoihkhit tak un pai ding in hon sawl zenzen ua, kou leng ka kisapah uhi. Ka mitbelh leng khiak nalam kathei a, poimohlua kahihman in kin deuh a ka zon leh ka mupah vanglak a, dawr kong a cement taak tung a kia himahleh Pathian in ka mitbelh natawm hon kepsak ahi ding a, a glass leng ana kek kei vanglak hi. 

Ka lawmpa mittui pawt in ki-diik hit-hit a, ka khut veilam in kaleen a, kal kon suanpihta hi. Kei bel ka mittui khat leng apawt kei…vaanlam ka en a “Toupa’n hon ensuk di hi a maw…” kachi a…Bible a Judate’n Stephen suang a aden lai ua Stephen in Van a Pathian taklam a Jesu ding amuh khawng ka ngaihtuahna ah hong kilang hi.

Ka lawmpa ka hehnem a, “Toupan Amah adia thuaktaak a honsim man in kipahhuai lua ahi,” ka chi a, ka thuakna ma te uh leng ngaihsaklou in ka mai san hik-hek uleh ka puanak uh kekzakte silh kawm in ka nih un khut kikhahlou in inn ka paitung uhi. Inn katun nung un Pathian kiang ah “Toupa nang adia thuaktaak a nonsim man in kakipak” chi in kipahthu genna ka nei ua, huai khit in ka liamna ma te uh kaki veelpan uhi.

Hiai nitak a hon vawte bel Bajrangdal-te ahi uhi. Ka Bible leh Labu hon suhsakte uh ana simzel uh hen la, huaite tungtawn in Pathian in a lungsim uah thu gen hen la, gingtu ahong suah ua, Pathian nasemtu ahong suah nading un ka thumsakzel hi.

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.