ABRAHAM GINNA THUPI TAKTAK MAH HIAM?

Gelhtu: LB Muan

18/02/14

Pathian a ginna lam thu a kigen khak chiang in i lungsim ah Abraham honglang masapen sek hi. Hiai Abraham in bangchituk a Pathian ana gingta a, Pathian a aginna pen thupi taktak mah hiam chih i suutkhawm ding.

 

[1] AMUH NGEILOUH PATHIAN ANA GINGTA 

Abraham hunlai in Pathian-hing ana bia mi om khollou hi ding in a gintak-huai. Abraham tawh ana kisai khadeuh Mesopotamia mite, Kanaan mite leh Egypt miten Pathian-hing ana belou uhi. Huchih hun a Abraham in Pathian ana gingta mawk chih pen thilthupi mahmah khat ahi. Abraham in Pathian’ thillamdang hih leng ana mu ngeilou a, mite apan Pathian-hing tawh kisai zakkhak leng ana neituanlou hi. A kiim-le-kiang ah muhtheih bawltawm pathian biak ding huchizah lai ah Abraham in amuh ngeilouh Pathian ana gintak pen thupi mah ahi.

 

[2] KANAAN AH KIAL TUNG, KIK DING SAWM TUANLOU

Abraham in apianna khua ‘Ur’ nusia in ‘Haran’ hongtung a, tua mun ah hun bangtan hiam hong khawsak khit in Kanaan gam honglut hi. Gintak bangloutak in Pathian’ gamchiam Kanaan ah kial thupitak hongtung mawk a, Abraham adin bel mangbatna thupitak hongsuak hi. Huchih hun in Abraham adin nidang a akhawsakna mun ‘Haran’ ahihkeileh a pianna mun ‘Ur’ a paikik ana ut-huai law mahmah ding in a gintak-huai, ahihhang in Abraham ana nunghei hetlou hi. Kanaan a kial atun sung Egypt ah va khawsa zual din malam nawt zawdaih hi. Egypt ah sih-le-hin kekal ah va khawsa mahleh Pathian tung ah vuui na kampau khat leng zanglou a, Pathian a aginna leng kiamsak tuanloulai hi.

 

[3] A TEEK DONG TA NEILOU, PATHIAN TAISAN TUANLOU

Pathian in Abraham kiang ah “Na suante luipi-piau-a-piaunel simzawhlouh bang leh van a aksii te bang a tam ahi ding…ka hon vualzawl ding…” chi mahleh Pathian thuchiam tangtung dia gintak theih nawnlouh ding khop in hun hong kivei hi. Ta khat le piak in a om ngeikei. A kum lah hong upa deuhdeuh, Sara leng gaai thei nawn dia lam-et huai nawnlou ahihtan in leng Pathian apan bangmah amu naikei lai uh. Hichi dinmun ah Pathian a ginna koih teitei pen hai-huai leng bang hial ding in a gintak-huai. Himah leh Abraham in a Pathian a taisan tuankei lai.

 

[4] PATHIAN IN ISAK NGEN, TUA LE IT LOULAI

Sara in ateek nung in ta hon nei khong a, tua ata neih sun uh chu it mahmah ding un a gintak huai. Ahia, Pathian in Abraham kiang ah Isak halmang thillat ding in ngen phut nawn mawk hi. Abraham adin “Toupa hiaitelzaw kahih theikei ding” chih baihsam mahmah din i gingta. Ahi a, Abraham in Pathian anial kei, ahihziak in tuazan chu Abraham ihmu thei ding in gintak huailou hi. Sara in a tapa Isak halmang thillat dia a phallouh didan lah Abraham in theilaw mahmah dia, hiaiziak in a nupakal uah bangteng hongtung dia chih leng theihlouh ahi. Abraham bel tuazan genthei mahmah ding in i gingta.

Zingkal baihtak a atapa Isak tawh inn a nutsiat dek un a ji Sara bangmah theilou tawh aki khak khiakdan uh bel i theikei, ahihziak in Sara in a tapa mu-kik nawnpah din kigingta law ding hi.

Huailai in Abraham lungsim ah bangteng a om dia? Abraham kalsuan gik petmah din i gingta. Lampi a apailai un Abraham lungsim ah bangteng a luut dia chih i ngaihtuah baan kei. Innlam a amah chouh akik chiang in a ji Sara kiang ah bangchidan a gen-maai a, bangchidan a Sara hehnem ding ahia chih leng Abraham adia lunggimna khop pha din i gingta…Abraham in ateknung a aneih a tapa deihthohtak Isak bangmah theilou a kipaktak a asihna di mun zuan apai a etchiang in itlaw mahmah ding a, a lungtang nalaw sam ding in a gintak-huai. Abraham adin chu “Toupa ahun ta, hiaitel zaw kahihthei mahmah kei ding, na lawh-lawh hon lawh mai in, na utleh kei hinna lazaw mai in” chia kikou khiak ek mai ut-huai ding hi. Abraham in bel Pathian agintak ziak in a tapa neihsun leng Pathian adin a it kei lai…Abraham ginna zaw ana thupi mah hilou hiam…?

 

THUKHITNA

Abraham ginna thupi mah ahi i chilou theikei. Kamkhat mah a leng Pathian nial ngeilou a, Pathian’ ze-et nate a tuah hun a leng gin-omtak a Pathian’ khut leen gige Abraham bel vualzawlna mutaak mah ahi. Abraham in Pathian aginna thupi in lamdang hi!

SIMTUTE, ZE-ET NATE I TUAH HUN IN ABRAHAM BANGA GIN-OM A, PATHIAN THILHIH THUPI NGAKZOU DING IN KISA CHIAT NI!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.