NA KHUAK ZANG IN

Gelhtu: LB Muan

26/10/13

“Na khuak zang in” kichi mawk le “Ka zang mahvoi, khuak zanglou kua aom dia” ichi pah mai din a gingtak huai hi. Psychologist te’n a gendan un mihing tangpi te’n a khuak uh 100 lak ah 37% khawng lel zang uh chi uhi. 63% pen zatlouh aom chihna ahi. Khuak zangsiam zawdeuh te’n 37% sang a tamzawzek zang uh chihna ahi. Khovel ah khuakzang siamsiam lohching in mithupi suak uhi. Mihingte’n khuak a kinei chiat a, azang tamtam hampha in nuamsa ding chihna himai hi. Khuak zatna dia poimawh isak nate i genkhawm zual ding.

 

[1] NEKZONNA AH

Mihingte’n nekzonna tuamtuam i nei chiat a, akhen te’n nisa-nuai ah nek i zong a, akhen te’n air-condition nuai ah nek i zong uhi. Khuakzang siamten nek ding a tutmun uapat zong uh a, khuakzang siamloute’n nisa-nuai ah thagum zang in nek ding zong uhi. Khuak zangte’n neksenglouh aneih lai un thagum zangte’n suun nitum a asep nung un nekkhop ding chouh lawh khezou hamham uhi.

Nekzonna ah khuak zat ding ahi. Nisa-nuai a kilawh tawm a nekzong i hihtak aleh leng khuak zat ding ahi. Khuak i zatchiang in haksapi leng nuamtak azawh theihdan omsek hi. “Bang chi’n ka semkin thei dia? Bang chi’n kasep pen ahoih thei dia? Bang chi’n tam ka lawh khezou dia? Bang chi’n sem leng maban ah semlou in ka khawsa thei dia? Bang sem leng ka innsung ka vakzou zaw dia? Koi ah sem leng…” leh adangdangte sui detdet a sepding ahi.

Ganhing bang a khuak zang khollou a mawk sepsep, mawk hinhin ding hilou hi. Pathian in khuak hon piakpen azang siamsiam in nuamsa ahi chih theih ngeingei ding ahi. Khuak zat siamlouh ziak a nekzonna a genthei kisa a, Pathian tung a vuui mawk pen diklou hi…khuak zang ni!

 

[2] LAISIMNA AH

Lai i sinna ah leng khuak zat petmah poimoh hi. Khuak zang peihloute adin houchik leng haksa suak pahsek hi. Khuak zangte’n bel haksapi leng baihlamtak a theihtheih didan ngaih tuahtuah ua huchi’n baihlamtak a theih didan suikhe khongzel uhi. “Kei khuak hoihlou, kathei bun kei” ichih leh bel ei-le-ei kikhem kihilel a, khuak zang peihlou ihi chihna ahi. Khuak hoihlou aom kei a, himahleh khuak zang peihlou a thadah bel kitam mahmah hi.

Laisim didan, awlsamtak a theih didan, nuamtak a theihdet didan leh adangdangte suisui mai ding ahi. Khuak zangte’n sawtlouchik sung in tampi zilkhepah mansek uh a, khuak zangloute’n bel sawtpipi simmahle uh bangzah mah theituan khollou ua, theih leng thei sawtlou uhi. Tua ahihman in mite’ tung a i om utleh khuak zang ni!

 

[3] KIMAWL/THILHIH NA KHEMPEUH AH

Nidang a Italy te’ football peksiam mahmah khat kiang ah “Bang a na siamna thuguk?” chi a journalist te’n adot uleh aman “Ka khuak ka zang nasa mahmah” chi in dawng hi. Khuak zang siamsiam ahi mite’ tung aom te. Khuak zang hetlou a kimawl pen in bangtan mah hon tunlou ding hi. “Hichia ka hihleh hichi hi a, hiai didan ahi…” chihte ngaihtuah tuah ding ahi. Mahni a siamna om pen apunbeh didan sui gige a, ahoih theipen dia zatkhiak sawmzel ding ahi.

Bible ah David in Goliath athah nadia khuak a zatdan pen ettontak mahmah hi…Goliath’ tal chet ah suang neuchik in deng pukgeih mai hi. A hatna muang a khuak zanglou Goliath bel lianlaw mahleh suang neuchik a denpuk velvual in om maimah hi. Hiai ah David in Pathian panpihna a nget kawmkawm in akhuak leng zanghoih mahmah hi. En i khuak i zat didantak a zanglou a, i lawhsap leh Pathian ngawh mawklouh ding ahi. Pathian in khuak hon piak i zat ngai ahi…!

 

[4] ZI-LE-PASAL ZONNA AH

Mihing i kibatlouh dungzui in zi-le-pasal i zondan leng tuamchiat hi. Akhen te’n sum in zong ua, akhen te’n mit in zong uhi. Bil a zong pawl leng om hi (mite gen gingta mai). Akhen te’n taksa utna a zong pawl leng om a, akhen in lah zong hetlou a khatpouh neiphut chih bang leng om thepthupzel hi.

Zi-le-pasal ding zon hun a khuak zang hetloute’n koppih aneih nung un akhuak uh a zatna di uh hongtam mahmah a…a damsung un lungsim seengtak in khawsa daih uhi. Himahleh, zi-le-pasal ding zon hun a khuakzang mahmah te’n koppih aneih nung chiang un lungsim tawldamtak in damsung zang uhi…(zi-le-pasal zonna ah Pathian panpihna ngetlouh ding chi ihi zenzen kei, zi-le-pasal zondidan achiang zaw a kigelh sim ut te’n RnR page ah “Koppih bangchi zon ding” chih ana sim un).

 

[5] PATHIAN-THU-AWI NA AH

Pathian i biakna ah leng i khuak zat ding ahi chi le maksa kitam khamaithei hi. Tulai khovel ah gingtute iki et vengveng chiang in, ei deih dandan a Pathianthu awi-sawm leh ei utdandan a Pathianthu zui kitam mahmahta hi.

Isai:55:8-9 ah hichi in kigelh hi…Ka ngaihtuahte lah na ngaihtuahte ahi ngal kei a, na omdante leng ka omdan ahi sam kei, Toupa'n a chi. Vante lei sa'ng a asang zaw bang in, ka omdante na omdante uh sa'ng in a sang zaw ngal a, ka ngaihtuahte leng na ngaihtuahte uh sa'ng in a sang lai hi.

Pathian pen mihing dan abawl a, ei kipahna a kipak dia, ei dahna adah din kikoih a, huchia ei hoihsak dandan a i biak mawk pen thil lauhhuai ahi. Saptuam a i kizatdan, i sum thohdan, i vahawmdan leh nasepdan te ah khuak zang a Pathian lungsim zon petmah ngai hi.

Khovel thiltawh Pathian thu kipolh khawm gawpta, Pathian-laa leh setan-laa le kithei-kak nawnlou, Pathian-music leh Setan-music le kikhen-kak thei nawnlou in setan-music bang Biakinn ah kitumging lumlum maimahta hi…tuabangte changkangna in kila lai hi.

Gingtu khat in anek/adawn theih leh theihlou dite natawm le ki khenkak thei nawnlou. Pathian bia a iki koihkoihlai a setan mangtutphah mai a kuunkuun kihi khathei hi. Ei pen in khuakzang a Bible a kigelh suidetdet a Pathian biak didantak, phat didantak, khros puak didantak leh Jesu nungzuih didantak i sui-khiak a, gingtu hin didantak ahin ding ahi. A huchih keileh den chiang in Jesun “Kon thei ngeikei” a chihte lak a telkhak theih mawk ding ahi!

 

THUKHITNA

Innsung khosakna, tate kepna, lawm polhna, niteng hunzatna leh bang peuhmah i hihna ah khuak zat mahmah kuul hi…tuateng gelh le sau i sa lawkha ding a asim di i om kei kha ding…

Mihing khuak neilou aki om kei, azang theilou leng aki om kei, i zang peih kei a ahi. Pathian in i khuak zang mahmah dia hon deih ahi. Pathian in Ama’ batpih a honsiam mihingte gentheitak leh khuak zangsiamlou a ganhing bang a om mai din hon deih keilaw di chih genle ngailou a i theih ahi. Bang peuh ihihna ah Pathian’ hon piaksa ‘khuak’ atam theilam zatsawm ni. A selam leh Pathian’ deihlouh nalam ah zanglou in, ei adi leh mite adia phatuam din leh honsiamtupa min letna din I KHUAK ZANG NI!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.