JESU IN HON KAHKHUM AHI DIA AW...?

Gelhtu: LB Muan

06/03/20

Pathian mihing hongsuak a, leitung a hongpai in tatna thu a tangkoupih lai in Israel tate’n amau hondam dia hongpai a Messiah uh ana sang nuamlou maimah uhi. Jesu in a it mahmah a mite dinmun beidot huai sa in Jerusalem a kahkhum maimah hi...Luke 19:41. 

 

1. EI HON KAHKHUM AHI DIA AW...?

Bible hoihtak a i suut leh Pathian in a pahtak mahmah mihing hunkhop om uhi. Midiktat a asim bang, mi gin-om a akoih bang, Ama’ lungsim bang pu achih bang, mi hoihkim achih bang, Pathian lau-mi achih bang hunkhop om uhi. Tuabang mite Pathian in pahtak chihtak in pakta a, avaan vualzawlna tampitakte dongsak hi.

Pathian in eite hon enleh bang ahon chi mah diam aw...i hinkhua, i niteng hun zatdan, i khawsak dan, i Pathian nasepdan, office a i nasepdan, i innsung kepdan, i sum zatdan, saptuam a i thil hihdan, khotang a i vaihawm dan, i khristian hinkhua Toupa a lungkim mah diam maw...Toupa’ kipahna ah i omkha mah diam aw...

...ahihkeileh Jesu in a didan hon theizou nonlou a, Jerusalem a kahkhum bang a hon kahkhum maimah ahi zaw dia aw...?

 

2. I INNSUNG HON KHAKHUM AHI DIA AW...?

Bible ah innkuan kituaktak a Pathian’ na semkhawm hunkhop om uhi. Hun haksa tampitak pal a Pathian’ min a kalsuan tamtak om uhi. Tuate Pathian in pakta mahmah a, amau te’n haksatna atuah hun un a thumnate uh ngaihkhiak sakzel hi.

Eite innsung kikepdan, kithu-nun dan, Pathian adia kal i suankhop dan, khalam i ki makaihdan, i nekzon dante, i sum muhdan leh zatdante Pathian in hon enleh a pahtak i loh mah dia aw...

...ahihkeileh i innsung a le Jesu tazou nonlou a, a didan thei non tuanlou a Jerusalem a kahkhum bang a hon kahkhum maimah ahi zaw dia aw...?

 

3. I SAPTUAM HON KAHKHUM AHI DIA AW...?

Jesu khovel ah hong pailai in Pathian thu a dangtakte khempeuh kiang ah khalam thu hoihtak in hilhzel hi. Mi mawl chikchikte hi in Pathian thu thei mahmahte tanpha khalam a dangtakte khempeuh kiang ah khalam ann pezel hi. Salam a damloute le hihdam a, Amah gingtate khempeuh tung ah athil hihtheihna sulangzel hi.

Jesu in i saptuam sung uah khalam dangtakna nei bangzah hon mumah diam aw...khalam dangtakna liantak om bang hitaleh le Jesu in khalam tui hon dawnsakna ding in eite’n Jesu i na vaidawn ut nadi ua aw...Jesu in thillamdang ahih theihna ding in eite lak ah ginna amu mah diam aw...?

I saptuam kikepdante uh, i biakna piakdante uh, i sum kaihlutdan leh zatdante uh, i saptuam kalsuan dante, i saptuam nasep dante Pathian adia gimnamtui a saantak ahi mah diam aw...?

...ahihkeileh i saptuam sung uale Jesu tazou nonlou a, khasia kisa a Jerusalem a kahkhum bang a hon kahkhum maimah ahi zaw dia aw...?

 

THUKHITNA

Jesu in Jerusalem maban ding a genkhol a, atawp in Jesu in “...veh a na om ni natheihlouh ziak in” achi hi (Lk.19:44).

Jerusalem a tengte bang a khalam thu buaipih a neilou a, khovel vai kia a i buai leh i maban ding lungziinhuai kha ding hi. Tuhun ei adia hun manpha ahi, veh a i omlai thei in Pathian zon hun in zang ni!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi ana CLICK in.