JAWLNEI HOSIA THUMANDAN

Gelhtu: LB Muan

16/11/18

Thukhunlui hun a Jawlneite mohpuakna bel Pathian-thu a kiang ua hongtung bangbang hangsantak a genkhiak ding chih ahi. Hiai ah Jawlnei Hosia bel Pathian-thu genkhiak kia hilou a, sep a asepsuah ding mohpuakna piak in om hi…

Israel taten Pathian-hing taisan in pathian dang khawng bia uhi. Huchia Pathian’ mit a kihhuai petmah ahihlai uale Pathian in amaute a itdan leh maban a thil hongtung ding alah khiakna ding in Hosia hinkhua tungtawn in thu gen hi. Hiai ah Jawlnei Hosia a etton huai dan i suut ding.

 

1. JI DIA KIZUAK NEI

Pathian in Jawlnei Hosia houpih a, numei kizuak khat a ji dia nei ding in sawl hi. Huchi in Hosia in Numei kizuak Gomer tuh aji ding in pi a, kitenpih hi.

Pathian in angkawmna ngaikhawk petmah hi. A mite hichibang thilthang-huai apat kikem siangthou ding chih Pathian thupiak ahi. Jawlnei Hosia inle hichibang thangtatnate apan Israel mite kikem siangthou dia ana thuhilhden leng hikha ding hi. Huchibang dinmun ah mi-naran le hilou, Pathian’ Jawlnei khat in kizuak ji dia nei di chih mawk pen Hosia adin ut huailou law mahmah ding hi.

Hosia in mite kiang ah “Pathian in kizuak ji a nei dia hon sawl ahi” chi lehleng miten gingta mawklou ding uhi. “Pathian’ nasem khat in kizuak ji dia nei” chi a miten nuihsan a kou zialzial uhle hikha maithei…Hosia in maizumna tamtak ana tuak leng hikha maithei…Hosia in bangteng tuak a bangteng a lungsim ah om hiam chih i theikei, ahia Hosia in Pathian’ gen bang in kizuak ji ding in nei hi.

Mihing numei-pasal kal a thangtat petmahte natawm inle koppih ding in nungak/tangval siangthou mah deih uhi. Pasal thulim hetloute natawm in ji hoih adeih lai un Jawlnei khat zet in kizuak ji dia neih ding chih thil baihsam hihetlou ding hi. “Toupa nang na gin-omtak a kasepna a hiai maw ka tantawk” chi a kah ngoih-ngoih theih dinmun ahi.

 

2. TATE’ MIN HOIHLOU NGEN PHUAHSAK

Pathian gen bang in Hosia in kizuak ji ding in nei a, huchi in ta pasal hon nei uhi. Huaitakin Pathian in “amin din ‘Jezrel’ na-phuak ding uh” chi hi. Ta nihna din numei hon nei ua, Pathian gen bang in amin din ‘Loruhamah’ phuak nawn uhi. Huchi in Gomer hong gai nawn a, tapa hon nei nawn hi. Hiai pen leng Pathian gen bang in amin din ‘Lo-ammi’ phuak uhi.

Hosia tate min khiatnate hoihlou thei petmah uhi. A khiatna te ‘Pathian in thukkik ding’ ‘Hehpih louh’ ‘Ka mite hilou’ chihkhawng hitel hi. Hosia-te nupa adin atate uh min sap ut huai hetlou ding hi. Toupan a ta masapen min aphuahsak in phun hetlou hi. “Toupa hiai hial zaw ka deih mahmah kei” leng chilou hi. A ta nihna hongpiang in “Toupa tutung zaw ken ka phuakta ding” le chituanlou hi. Pathian in Hosia-te nupa ta thumna min aphuah tan ah leng bangmah genlou lai hi. Hosia lungsim ah bangteng a om diam chih i theikei, Himahleh Pathian gen peuhmah nial hetlou in thumangtak in hihzel hi.

Kuapeuh in ta i neih chiang in amin phuaktu di in amin ding in min hoih, a khiatna hoih mahmah ahihkeileh mi minthang leh mithupite min khawng phuakzel hi. Khenkhatten Bible apan min hoihsak penpen khawng kila zel hi. Tate’ min dia min hoihlou leh a khiatna hoihlou kuamah in ki deihlou ding hi. Hosia dinmun ah ki ding hileh Pathian’ thu ki mang khollou ding hi.

 

3. A JI VALEIKHE NAWN

Ta thum aneih zawh un Gomer in a pasal taisan in a hun paisa a aomdan in va-om kik nawn a, pasal dang tawh a utdan teng in thangtat nawn hi. Pathian sawlna bang in Hosia leng kuannawn a, a ji valei nawn hi. Pathian apat thu hongtung peuhmah Hosia adia azuih nuam ding khat mahleng omlou hi. Huchipi inle Hosia in khatvei mahle Pathian nial hetlou a, Pathian gen dandan in kalsuanzel hi.

Kizuak ji dia nei a, ittak a kem a, ta thum hial neih khawm nung a hon taisan a nidang a athangtatdan a thangtat nawn pen kuamah in ki samkik ut khollou ding hi. A vasam kik chouh hilou a, sum a valei nawn ding chih pen tulai khovel ah a ut vaang mahmah ding hi.

 

THUKHITNA

Pathian’ Jawlnei diktakten Pathian-thu mang petmah uhi. Sih theihna dinmun ah leng Pathian in gen dia a hilhte genkhezel ua, hih dia Pathian in a sawl peuhmah hihzel uhi. Hiai ah Hosia in Pathian’ Jawlnei diktak ahihdan chiangtak in sulang hi.

Hosia dinmun ah ding le Pathian mawhsa in Pathian tung ah kivui petmah kha ding hi. Numei kizuak ji dia nei a, tate min hoihlou ngen phuahsak ding chih ki ngaingam hetlou ding hi. Mite hon gensiat dingdan leh mite hon muh dingdan ngaihtuah in Pathian’ thu kimang khollou ding hi. Hiai ah Hosia in bel mite muh dingdan leh mite gensiatnate khawk salou in Pathian’ gen ahih nakleh Pathian chih dandan in kalsuan mai hi.

Pathian’ ta taktak in Pathian aw za thei a, Pathian deihdan theithei hi…Pathian’ ta i hih a, Pathian aw i zak leh khovel mite hon koih dingdan leh mite hon muh dingdan ngaihsut ding hilou a, hangsantak a Pathian deihdan a kalsuan ding ahi. Mihingte sang a Pathian lauh zawk ding ahi.

Thil khatpeuh ah Khovel etdan leh Pathian etdan kibang khollou hi. Thil bangkim Pathian mit apat et a, Pathian in hoih asak nakleh en ahoih leh hoihlou ngaihtuah nonlouh a Pathian thu man mai ding ahi.

 

Jawlnei Hosia bang a Pathian thu mang ding in simtute Toupa’n hon hon makaih hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.