A NINHUAI HINKHUA

Gelhtu: LB Muan

15/03/17

Tulai khovel ah hinkhua ki-ning a khawsa mi tampitak om hi. Ahihpeuh uh ning ua, kipahna himhim neilou in hinkhua zang uhi. Nang leh kei leng hinkhua ki-ning te lak ah tel i hikha maithei, tel khalou ihihtak leh leng i kiim-Ie-kiang ah hunkhop om ahihman un amaute i panpih theihna ding in bangziak a hichibang a hinkhua ki-ning mawk uhiam chih suutkhawm ni.

 

1] TUP-LE-NGIM NEIHLOUH ZIAK

Mihing in tup-le-ngim i neihlouh chiang in hih ding leh hihlouh ding kitheilou a, zotna di lampi leh i tunna ding mun leng kitheilou hi. Huchi in niteng in hih ngeiteng mah hih hong ngai a, huaichiang in i hindan nin huai in lung-hing-a-hing maimah bang kisak in om hi.

Tehkhinna khat gen zualle, Tempawng tawi a saat di bangmah i neihkei aleh chu Tem giktak tawitawi pen a nin huai hun hong om ding mah ahi. Tua ahihman in i Tem tawi a phatuam theipen dia i zat utleh bel i saat ding banghiam zon a saat ding ahi.

Laisimlai hi in sepna nei/neilou hita lele tup-le-ngim hoihtak neih ding ahi. Maban ah hiai ka bawl ding, ka hinkhua ah hiai ka hihkhe ding chihte a om louhchiang in maban neilou kisuak a, khovel honpi dandan a pai maimah ngai hi. Khovel in i utlouh nalam a honpi khakchiang in i ki-nin tha hongsuak in sih bang ki-ut vungvung maimah hi. Tua ahihman in, aneu/alian, a thupi/thupilou chilou in tupkhat nei a hinkhua i zat ngeingei ding ahi. A huchih keileh tuipi lai a Long a zotna di lam theilou a tui-ki-hawt in a langlang a anawk tawh kibang ding i hi.

 

2] GUALTE PHAZOULOU KISAK ZIAK

Tamtakte’n midangte a engdan chouh uh gengen ua, amau lah bangmah hihsawm tuanlou chih leng omtham hi. Mite’n lawhchinna leh minthanna hon ngah chiang ua ana englua in “kei zaw…” chi a ana ki-ngai sepah maizel. Mite’n lawhchinna a ngahna di ua bangchituk a haksatna leh gentheihnate pal a ana pang uhiam chih lampang suutlou a midangte hampha sak a sa mawk. Mite’ talent-te eng mahmah a vangpha uh sak a sa mai, ahihhang a mahni in bang talent nei a bang hihthei hiam chihte sui khiak sawmlou a aguk a ana kipese gige. Mite’n Pathian’ vualzawlna a donte uh muthei mahmah lah mahni tung a Pathian’ vualzawlna hongluang lutte muthei mahmahlou. Hichibang lungsimpu leh thiltheisiamloute’n bel mihing tung leh Pathian tung ah khasiatna ding leh vuuina ding hau ua, a hinkhua uh ning-kitel huai sa in “bangziak a ana piang ka hiam?” chih dotna amau leh amau kidong mun mahmah uhi.

Mahni hoihna, hihtheih nalam, talent leh siamna tuamtuam ei a kiphumgute sui khiak a pholhsuah ding ahi. Pathian in talent honpiak tuamchiat ahihman in mite eng vungvung a hinkhua zatding hilou a, en leng siam nalam nei i hi chih kiphawk ding ahi. Mite chouh eng-eng mailou in eileng mite eng theihdia haksatnate pal a lohchinna ngahzou dia kisak ding ahi. Ki ngaihsiatna in hinkhua hon subuai in ning-kitelna hon tunzel ahi chih mangngilhlouh ding ahi.

 

3] TOUPAN EI ADIA PLAN A BAWLPEN THEIHLOUH ZIAK

Pathian in i hinkhua ah plan hoihtak nei ahi chih i mangngilh chiang in i hinkhua ki-ningsek ahi. Honsiam tupa’n honsiam naziak leh hiai khovel setak lak a honzat utdante suikhiak ngeingei ding ahi. Ei adia hing dan a i-kikoih chiang in bel hinman omlou mah bangsek a, hiai khovel leng nin huai mahmah hi. Hilehleng Pathian adia i hong-hin chiang in bel hin thaman om in i poimohdan kithei suah semsem hi.

Mi tamtakte’n hinkhua nin huai sa in mahni hinna natawm ana la maimah uhi. Ei Khristiante bel ei adia hing kihi nawnlou a, sisan a hon leipa Jesu Khris adia hing ki hita ahi chihte mangngilhlouh ding ahi. Tua ahihman in tomchik damsung a Pathian adia banghiam sepsuah sawm a honzat utdan leh deihna lamte suikhiak ngeingei a hinkhua zatding ahi.

 

THUKHITNA

Hiai atung a kigelhte louleng hinkhua ki-ninna ziak tampi a omtham ding, hilehleng huaiteng gelhsenglou ding i hi. Hiai a kigelh teng tungtawn in hinkhua ki-ning nawnlou ding in thathak la le chih deih huai i sa petmah hi!

FOR I KNOW THE PLANS THAT I HAVE FOR YOU,’ DECLARES THE LORD, ‘PLANS FOR WELFARE AND NOT FOR CALAMITY TO GIVE YOU A FUTURE AND A HOPE… (JEREMIAH 22:11)

Toupa’n simtute hon vualzawl hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.