KATHEIH SIAMLOUH KHENKHAT

Gelhtu: LB Muan

16/10/19

Tulai khawvel ah Piangthak leh Piangthaklou le theihkhen theih nawnlouh di khop in i Khristian hihna uh dau-gawpta maimah hi. Piangthak kichi lah kikhekna omtuanlou, hih ut teng hihzel, nekguk lah poisalou, midangte itna lah nei mahmahlou, ut teng ne-a-dawn, thudik lah gum ngamlou, ahoih thei nazenpi alah hihtuanlou, Bible lah simpeihlou, Pathianthu lah thei-a-thei lah zuituanlou, kha-miitna neuchik le neilou, Pathian’ deihdan zong mahmahlou a mahni hoihsakdan teng a gamtang, Pathian lauhna le neilou, peih dandan a Khros pua a nopsak natan lel a Jesu nungzui kihi veksim maimahta hi.

Jesu’ khekhap i zuihna hinkhua ua ka theihsiamlouh khenkhatte…

 

1) KHROS HIA I PUAK, AHIHKEILEH SUANGTUM?

Jesu neite, piangthak a hotdam tate i kichi a, Jesu nungzui a Khros pua i kichihlai un i Khros puak pen uh Khros taktak ana hilou a Suangtum hiam, Singbong hiam, Siktum gikpi hiam ana paw kuih-kuih ihih khak ding uh lauhhuai petmah hi.

I khristian hinkhua uh ka et chiang in Khros pua a nisa nuai a kho-ul kai niip-niap a gim-le-tawl kisa tamtakte’n i puak pen uh Khros hizawlou a Suangtum/Singtum khawng pua ana hizaw maimah ihi di ua aw chihkhawng ka ngaihtuahna ah lian mahmah mai hi.

I khelhna puakgik i puak pen khawng Khros sa-kha maimah ihih ding bang uh leng thillauhhuai ahi. I tuhgah-at a, ihih khelhman mu a lungkham leh gentheitak a i om hun a khelhman haksatna i tuahte khawng Khros puakna i sakkhak ding uh thillauhhuai ahi.

Khenkhat ten Khros pen ut hun a pua a, ut hun a koih khezel ihi hia chih bang leng kiveel tuak mahmah hi. Lamsukna munte chouh a paw ut a, lamtou leh ni asat chiang a koih khezel pawl leng kitam mahmah ding in gintak-huai hi. Phur dandan a Khros puak ding hilou a, hunteng, munteng, nisa, vuahzu nuai leh anuam-ahak hun a puak gige ding ana hizaw ahi.

Khros mah pawkha ihih ua Ieh i Khros puak in ei hinkhua hon sukkhak a i hinkhua hon khek ding ahi. I Khros puak in i duh-le-deihte, i nekzonnate, office a i nasepdante, i omdante, i mi bawldante, i innkuansung kikepdante, saptuam a i kizat dante, i lungputte, i sum zondante, i ngaihtuahte, i hinkhua zatdante, i utte, i lunggulh leh lunglutte hon sukkhak vek ding ahi.

 

2) BIBLE HINPIH IHI HIA, AHIHKEILEH THEIHTHOH?

I khotaang khawng uh, i saptuam sung khawng uh, i khristian hinkhua khawng uh hoihtak a i suut vengveng chiang in “Bible hinpih hizawlou a theihthoh i hizaw uh” kichi leh kigenkhial khollou ding hi.

Gingtu kichite lak ah Bible hinpih sang a theihthoh a tamzaw hiding in gintak-huai hi. Bible theihthohte lak a telkha ihih ding ut-huai hetlou hi. Jesu neilou singbul/suangbul bia tamtakte lak ah Bible ana simsek a Bible thu thei mahmah tamtak om uhi. Tuate bang a Bible thu theih-a-theihthoh ihih maimah ding uh thillauhhuai ahi.

Bible hinpih hile i saptuam sung uah kikhentuamna, ki-muhdahna, kipilsakna, vaihawm-ut kituhna chihte omlou ding a. Ki-itna leh lainatna in i kidim zaw ding uhi. Bible hinpih hile i innsung leh khotaang leng chidam ding a, kituaktak in kikhawsa vek ding hi.

Bible bel sim ding leh theih ding mah ahi, ahia tuate sang a poimoh zawlai chu hinpih ding ahi. Khris sisanpha a tatte ihi uhi (1 Pet.1:19), ei utdandan aom thei ding ihi nawnta kei. Man a leisa ihihman un ei hon leitupa’ deih dandan, chih dandan, gen dandan a nungta dite ihi uhi. Sikha in apu’ thu aman bang in en leng Jesu’ thu i man ding uh ahi. Sikha (servant) in amah neitupa (Master) lungkimna di kia zong a aom bang a eite’n leng Jesu deihdan kia a hin i sawm ding uh hizaw ahi.

 

3) PATHIAN IT IHI HIA, AHIHKEILEH KHOVEL?

Banghiam ihih chiang un Pathian it-lawdan leh phawk-lawdan in Pathian’ min bang i lou mun zawzen uhi. Pathian it taktak hile Pathian’ thu kimang ding a, Ama’ chihdan a ki nungta ding hiven. Tua lah ei hoihsak dandan a ki gamtang mai. I kam a Pathian’ min kilousek alah ut teng ki hih ngam, nekguk le poisa tuanlou, mahni hamphatna di mun a adikloupi le hih ngam, biakinn alah hallelui theizel…Pathian it ihi hia, ahihkeileh khovel paallutnate?

Khovel a teengden di bangmai in i ki-khual ua, i sihsan di lel buaipih in i hunteng i zangbei uhi. I hun tamzaw leh ngaihtuahna khovel adin kizang bei gige a. i lungsim uah i khovel khosakna tawh kisaite chouh ki-ngaihtuah hi. Pathian it taktak hile khovel sang in i tangtawn mun ding i  lungsim ah lianzaw gige ding a, hun teng in tangtawn mun di ngaihtuah in tua lam ah gou kikhol khawm zaw ding hi.

I lungsimte un khovel it a, i muk chouh un Pathian it ahi zaw maimah dia aw…? I taksa leh ngaihtuahna teng khovel adia zang a, khovel nopsaknate a kitaal a, banghiam hunte chouh a i kam in “Toupa” chi lel khawng ihi maimah di ua aw…?

Jesu’n “Hiai mite’n a kam un a hon it ua, himahleh a lungtang un a hon gamlat uh” achihte lak a telkha ihih khak ding uh ut-huai hetlou hi.

 

THUKHITNA

Jesu’ sisan a sawp ihihman in Jesu’ daan zuih ngai a, ei deihdan hi nawnlou in Pathian deihdan leh paidan a pai ngaita hi. Gingtu hinkhua diktakzaw haksatna leh kipahna tonkhawm hel-hel ahi. A haksalam ngaplou a kipah nalam chouh i zon chiang in kipahna muhding omtuanlou hi. Kipahna i muhna ding in lam haksa i tot-ngam kuul a, Pathian’ lungkimna i sukkhak ngai hi.

Jesu'n a nungzuite kiang ah, “Kuapeuh in a hon zuih nop leh, amah gimthuak khawksalou in, a Khros pua in hon zui heh [Matthai 16:24] ana chi hi. Nang-le-ken hiai Bible tang bang i loh dia?

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.