BANG ZIAK A LAWM PAWL…?

Gelhtu: LB Muan

01/02/15

Nidanglai leh tulai khovel ah lawm polhdan leng kibang nawnlou a, iitna tak tawh lawmpawl leng kivang mahmahta hi. Ki iitna lah dau deuhdeuh, khawksakna lah tawm deuhdeuh…hichibang khovel a hingte ihih tak man un, i lawm polhte i polhna ziak kiveel thak zual ni.

 

1. MIHING LAWMPOLHDAN

[a] NEU APAT KIPOLH KHAK ZIAK

Neulai apat a iki polhpih, i khanletpih, a innkuante uh nasan ei innkuante bang a ibawl, anop leh haksa i paltouhpihte bel ki mangngilhthei ngeilou a, lungsim ah om den uhi. Tuabang a i ngaihnat lawm-le-vualte bel nop-ni hi in dah-ni ah leng kitaisan ngeilou hi. Khovel i palpih masate ahihman un iki iitna leng lian mahmah a, sangam pianpih hial bang in ki-ngaina mai hi. I neu apat i polhte bel damsung in kipawlden ut hi. Neu apat a kizawp nagui ana omtak ziak a kipawlden ut ana hi ahi.

[b] LUNGSIM/LUNGLUT KIBAT ZIAK

Lungsim kibangte kipawlthei uh chih pen dik mah ana hi ding hi. Kithei ngeilou ngen om khopna mun khawng ah hun sawtlou in lungsim kibang leh lunglutna kibangte hong kiman khepah ua, hong kipawl theipah mai uhi. Nek-le-dawn, sep-le-bawl, nekzonna, siamsinna leh adangdang ten i lawm ding hon bawlkhe mai hi. I lunglutna leh lungsim kibatpihte mah ki-ngaina a, tuate mah kipawl ut ana hi ahi.

[c] HAMPHATNA DI LUNGGULH ZIAK

Mahni hamphatna ding ngaihtuahna ziak a lawmpawl bang leng omtham hi. Sum-le-pai, min hoihna, minthanna ahih keileh nopsakna banghiam lunggulhna ziak a lawmpawl ihih leh bel i lawm pen pawl kihi zawlou in amah neih bang hiam i lunggulh pen pawl kihi zaw maimah ding hi. Hichibang a mahni hamphatna ding ngaihtuahna ziak a lawm polh pen thilhoih hetlou leh tawpsan ding ahi.

[d] KISEL/KIHUMBIT NADIA ZATTHEIH ZIAK

Mi khenkhatten a lawmte uh kiselna din zang uhi. A guuk a thilhoihlou banghiam hih ahihman un athil hih uh a kiselna ding un mihoih ahih keileh Pathian phawk kuahiam ngai mahmah dan in pawl uhi. Tua a mipolhpen mihoih leh mite zahtak ahihman in amah leng alawmpa/lawmnu liim ah kiselthei hi. Amah adin a lawmpa/lawmnu pen kiselna hoihtak himahleh a lawmpa/lawmnu adin bel minsiatna petu suakthei maimah hi. Hichibang a mahni kiselna dia lawmpolh pen tampitakte chiin ahi. Mihing mai ah kisel zou mahle Pathian’ mai ah kisel zoulou ihihman in a phattuamna omtuanlou hi.

[e] BAWL HOIH UT ZIAK

Mihoih mahmah khenkhatten lah lawm hoihlou pipi kipolhpih thepthup uhi. Mi hoihlou kipolhpihthei bel amau leng hoih ding in gintak huailou hi. Ahihziak in mi khenkhat mihoih mahmahten mihoih hetlou abawl hoih ut ziak un kipolhpihsek uhi. Mihoih loute bawlhoih ut ziak a kipolhpih a, mihoihlou polhte ziak a minsiatna tuahle khawk saloute bel pahtak-huai mahmah uhi.

 

2. JESU LAWM POLH DAN

Jesu lawmte en zual le, nga-man mite, siahkhon mite, politics saite, kizuak te, mikhialte, sakhaw mite leh a dangdangte pawlkhawm vek hi. Amah hamphatna di hiam ahih keileh amah min hoih nadia pawl hizawlou in apolhte bawlhoih a ut ziak in ana pawl zaw hi. Thumanpha taktak sinsak a, a hinkhua uh khek lamdangsak a, lungtom leh hehbaihte nasan lungduai mahmah suak sakzou hi. Pathian leh mihinpihte iit didan, ki-iit tuah didan, melmate nasan iit ding ahihdan uh sinsak a, leigou delhlou a vangou delh didan leh Pathian adia hinkhua zat didan leh thiltampi sinsak hi. A polhte a iit luatman in sinsakna kia pelou in a hinna nasan leng ana lan hial hi.

 

THUKHITNA

Jesu bang a lawmpolhte iit i om diam maw…iitna taktawh lawmpawl le ki om nawnlou a, ei hamphat nadia lawmte taihsan ngamna khovel ah Jesu bang a lawmpolhte iit i omlai mahmah diam…mahni hinna lawmte adia pe ngam ki vang mahmah ding in gintak-huai hi. Jesu lawmpolhdan en in tua apat sinlai lak sawm ni.

 

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.