Gelhtu: LB Muan
22/03/16
Mi nunnem hi kholkei lele Mission Field ah chu Vakhu bang a nunnem a nasep ngai hi. Outreach pai na khawng ah tuidawn di honna pia leh nekdi hon pia tuah di bang achang in om khazel mahleh hun tamzaw ah mi tamtak ten a gate ua i lutma natawm in honna hawlkhia ua, hon hamsiat zaw-mahlai uhi.
Maban sawnzel in nisa nuai ah tract leh NT Bible khawng hawm in gamla pipi kivaksek hi. Achang in houlimpih theih di tuahna munte ah Pathianthu kihoulimpih in huchi'n kal kisuan zomzel hi.
Jammu & Kashmir ahi a, nikhat chu khua khat a tract hawmkhin mual apan kumsuk in innlam kon zuanta uhi.
Lampi a lawmte tawh kong paisuk uleh veilampang a lampi kiang ah pasal mi-thum hiam ana tu uhi. Ka ma apai ka lawmte kiang ah simmohtak in "Jesu gingta a atanchin gen a na hichi vak uh, na mit un Jesu na mu ngei ua hia?” ana chih khum uhi.
Ka lawmte'n paulou in paisan sawm mahle uh hon simmoh bawllua uh ahihman un ken leng "Ram na mu ngei ua hia, Krishna na mu ngei ua hia na gintak uh?" kachih khum leh amau le "Mu ngeilou" hon chi ua, huai tak in kenle "Huai tawh kibang ahi" kachih khum leh dai vengveng uhi. Huchi'n koule ka paisan uhi.
Huai ni in ana dawnglou in paisan le ung vualzou kisa di ua "Khristian kichiten ka dotna dawng theilou uh, amuh ngeilouh uh gingta uh" khawng chi in amau ginna pen kiveel hetlou ding uhi. Ka dawnna piak khauh lawsim bang mahleh a lungsim uh dengkha ahi chih amel ua pan kathei a, ahun geih a dawnna di hon pezel Toupa min ka phat hi.
Outreach bawl hun in Vakhu bang a nunnem a, Gul bang
a pil chu ana ngai lawtel mah hi. A dotnate uh nemtak leh piltak a dawn a-ngaihhun
tam a, huchi kawmkal ah khauhtak a dawnna piak a poimoh hun leng omzel sam hi.
____________________________________________________
# Na phattuampih leh midangte khualna in WhatsApp leh Facebook chihte ah ana SHARE sawn in.
# Article ki post thakte nana muhzelna ding in hiai atung a taklampang a "Follow" kichi pen CLICK in.
No comments:
Post a Comment