SALAM-AAN & KHALAM-AAN POIMOHNA

Gelhtu: LB Muan

23/09/13

Mihingte taksa damna di, khanna di leh niteng a nasep zawh nadia poimoh chu AAN ahi. Huai mah bang in i Khalam hatna di, khanna di leh niteng a Setan i dou zawh nadia poimoh mahmah chu niteng a Bible sim gige leh thumna neih ahi. Niteng a SALAM-AAN i nek gige leh KHALAM-AAN le poimoh ngaih a anek ding mangngilh louh ding ahi.

 

SALAM AAN (buh & meh) v/s KHALAM AAN (Bible sim a thumna neih)

1) SALAM AAN i nek hun in kine gige hi --- KHALAM AAN le nek hun a nek gige sawm ding ahi.

2) SALAM AAN nek di neihlouh khak di lauh ziak in gimtak in sun-nitum bang in na kisem hi. Akhen zankhawvak bang a semle tamtak ki-om hi --- KHALAM AAN bel sep ngailouh a nektheih gige ahi.

3) SALAM AAN bangchituk in buai lele nek hun in kinek sawm teitei hi --- KHALAM AAN bel “ka buai lua a, tuni zaw Bible kasim dah di” kichi maimah sek hi.

4) SALAM AAN bel nasem i gim leh kipoimoh ngaihzaw a, gilkial kisa in tampi kine-ek sek hi --- KHALAM AAN bel i gim-le-tawl ni in huchimai heh, tunizaw kichi utsek hi.

5) SALAM AAN ahihleh nikhat in 2/3 vei bang kinesek hi --- KHALAM AAN bel i nekkhak hetlouh hun tam mahmah kha ding hi.

6) SALAM AAN ne utlou ki omlou a, a limlim bang kiduhlai hi --- KHALAM AAN neksenglouh leh limtaktak Toupan honpia a, huaite ne a hatdin hon deih mahmah hi.

7) SALAM AAN nelou a hing bel kuamah khovel ah omlou hi --- KHALAM AAN ne peihlou a hing bel gingtute lah ah kitam lawzel hi.

8) SALAM AAN limtaktak nezoute hausa kisa in ki-eng hi --- KHALAM AAN nek pen a zawng leh hauten i nek ut dandan a athawn a nek gige theih ahi. Ane tamtam hampha himai hi.

9) SALAM AAN tam nekluat leh ahoihlou omthei hi --- KHALAM ANN bel atam ne zouzou khalam ahat himai hi.

10) SALAM AAN khenkhat in i sung hoihlai bang sesak thei hi, huchi inle kine thouthou hi --- KHALAM AAN in bel mimal, innsung leh khotang adin damna hon tunzaw hi.

11) SALAM AAN i nek zohlouh chiang in aan i duh nadin vitamin bang ki ne/dawn hi --- KHALAM AAN bel ki ngai poimoh khollou hi.

12) SALAM AAN nek di i neihlouh ni in genthei kisa in Pathian kiang bang ah ki vuii ut hi --- KHALAM AAN bel nek senglouh Toupan honpia a en kine peihloulai hi.

13) SALAM AAN nek di bel kuamah sawl ki ngailou hi --- KHALAM AAN nedia hon sawltute bang ki ning mawk hi.

14) SALAM AAN i duh keileh bel damlou dan in i kikoih hi --- KHALAM AAN i duh keileh bangmah lunghihmohna kineilou maimah hi.

 

THUKHITNA

SALAM AAN niteng a 2/3 vei khawng i nek gigelai a KHALAM AAN poimoh ngaih khalou i hihia? “Piangthak ka hi” i kichih leh hiai poimoh ngaihna i lungsim ah apian gige ding ahi. Piangthak i hih leh Bible sim a Pathian tawh hun niteng in kizang khawm ut gige ding a, i zat khaklouh hun in i lungsim nuam theilou ding hi.

Khalam a kial i hihlam i kitheih keileh bel Pathian apat gamla mahmah i hi chih phawkthak ni. Khalam a kial i hi chih i kitheih leh Khalam Ann nek kipan ni. Salam Ann kalkhat ne keile i taksa bangchituk in a kiam dia…? Bangmah kisem zoulou ding hi. Huai mahbang in Khalam Ann i nek louhna asawt leh bel khalam ah ana kichau mahmah ta ding a, khalam gal kidou zoulou ding hi.

Setan tawh kidou gigete i hihman in i Toupa apan hatna kipoimoh gige a, melmapa zohna ding in Bible simgige a Toupa kiang a thum gige ding ahi.

Mihing Tanghou kia in ahing kei ding (Lk.4:4).

Simtuten i theihdia hoih mahmah chu hiai ahi…salam galdoute le aan nelou in bangtan mah pangzoulou uhi. Ei gingtute bel khalam galdou den i hihman in tuni apan Bible sim in Toupa tawh bangtan hiam bek hunzat gige sawm ni, tua din Toupan hon panpih chiat hen!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.