ISAK THUMANDAN

Gelhtu: LB Muan

19/03/19

Isak thumandan lamdang ahi chi zawzen le genkhial kei ni. Isak bang a thumang hiai khovel ah vaang mahmah ding a, muh leng kimu khollou maithei lai hi. Isak thumandan vasuut sipsip zoukei mahle hiai ah tamlou i en ding…

 

[1] ISAK IN APA ABRAHAM THU MANG

Abraham in Pathian apat thupiak amuh man in a tapa ittak Isak chu halmang thillat ding in hon laan dek ta-mai hi. Huchibang a thil mulkimhuai hongtung dek ahi chih Isak in atheih in ahinna humbit din kisa leh apa’n mantangzou hetlou ding hi. Abraham bel tekta a, Isak ahihleh kum 20 valzek pan ding a gintak ahi, ahat laitak hi ding hi. Apa’ khut apat taikhiak sawm leh taikhezou mahmah ding hi.

Isak in sihding ngai-ngam ding in agintak-huai kei. Himahleh Isak in apa’ thilhih dek ahoih hia hoihlou chihle dong tuan hetlou in ganhing gawh di mahbang in dai dide maimah hi. “Pa bang ziak a ka hinna la dek na hiam, ka hinna zaw la dah mahmah mai in” chi in dotna hiam, ngetna hiam le abawl kei…Apa’ khut ah dai dide in aki pekhe mai hi.

Ei hile bel ‘kapa lungsim venglou ahita di, ka hinna hon lak dek tel’ chi in taikhiak sawm kia hilou in kileh vuak maithei hi. I damsung inle ‘Pa’ chi in kisam ut nawnlou maimah ding a, inn nusia in kipai mang maithei hi.

Ahoihlam ding ah bel nu-le-pa thu kimang kha ding a, himahleh i hinna hial i taan nadi tan ah nu-le-pa thumang ut kua i om dia?

Isak thumandan tehpih ding om khollou ding hi, Isak bang a pa thumang khovel ah kua a om diam maw…?

 

[2] ISAK IN A SILAPA ELIAZAR THU MANG

Isak in apa thu kia hilou in a silapa ‘Eliazar’ thu leng mang hi. Abraham in a silapa kiang ah Isak ji ding vazong ding in thu pia hi. Hiai hun in Isak kum 40 lak hita a, piching mahmahta hi. Abraham in ji zon di mawhpuakna a silapa apiak in Isak kam khat leng apau kei. “Silate zonsa ka deih kei, kei kaki zon di” leng achi kei. “Ka ji ding zonna ah kei leng kava hoh ding” leng achi tuan kei. “Numei hichibang, khachibangte ka deih a, ka deih dante nazong ding uh” le achi sam kei. A silapa zon muh penpen tawh kiteng din mansa in a om mai hi. Huchi in Eliazar in ahon tonpih Rebek pen soiselna kampau khat leng neilou in adamsung kipaktak in leh ji dang leng nei tuanlou in khawsa den hi. Isak in a silate’ thu natawm hoihtak a mang ahi chih chiang mahmah hi. Hiai in aki niamkhiakdan leng taklang hi.

Ei hile bang ichi dia? “Nu-le-pate na thring lawta uh, na tulai keilua ua ji zon danle nathei kei uh, silate le na mawlmawl utoh, kei ka kizon ding, kei ji di tungtang ah kuamah na kidaih lah thei kei ding uh…” chi in kuamah thu kila khollou ding hi.

Isak in a silate leng simmoh hetlou in athu uh mang mahmah hi. Isak thumandan tehpih ding om khollou ding hi, Isak bang a silate thumang khovel ah kua a om diam maw…?

 

[3] ISAK IN PATHIAN THU MANG

Pathian in Abraham kiang ah “Na tapa halmang thillat in laan in” achih pen Isak adin theihsiam haksa mahmah ding thil ahi. “Ka hinna la ut kapa’ Pathian zaw ka be kei ding” chihtheih dinmun ahi. Ahihziak in Isak in huchibang bangmah ngaihsun hetlou a apa’ Pathian mah bel tinten in khawsa touden hi.

A koppih ding toh kisai ah leng Pathian in apiak pen mah ngak in tua ah lungkim hi…Haksatna atuah hun in Pathian mah zuan a, athuman ziak in Pathian in a thumna ngaihkhiaksak pahpah zel hi.

A teenna gam ah kial hongtun in Pathian in Egypt lam a paisuklou ding leh Kumpi Abimelek kiang a khawsa ding in thu pia hi. Isak in Pathianthu mang a Pathian chih dandan in om hi. Pathian in hiai ah om in achihna munmun ah khawsa in Pathianthu a damsung teng in mang den hi.

 

THUKHITNA

Nang leh ken Isak thiltuah mulkimhuai tak i hinkhua ah tuak bang hile, Pathian i beel lailai diam? Niteng a Pathian’ vualzawlna simsenglouh i muhlai natawm aleng Pathian tung a vuidente hi hang a, Isak dinmun ah ding le “Ka hinna la ut nang Pathian hon be kei ning” kichikha maithei hi.

Isak in Pathian tung ah vuina ding zong hetlou in Pathianthu hoihtak in mang hi. Isak thumandan tehpih ding om khollou ding hi. Isak bang a thil mulkimhuai tak tuah nung a Pathian thumang khovel ah kua a om diam maw…?

ISAK BANG A THUMANG DIN PATHIAN IN SIMTUTE HON VUALZAWL HEN!

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.