NANG LEH KEI ZIAK IN MAW...!

Gelhtu: LB Muan

18/09/13

I ngaihtuah ngei dia aw...Nang leh ken Pathian’ thu i manlouh ziak in Pathian in Leitung hamsiat a, ganhing bangmah theilou te’n gawtna tuak ua, Jesu Khris mawhna bei in sih loh hi.

 

LEITUNG HAMSIAT IN OM

Pathian in lei-le-van asiam in hoihsa mahmah chih Bible ah i mu hi. Leitung in siatlam ma-nawh mahleh tuni dong in i-mit la di leh lungsim nousak zou hial di mun etlawm tampi muhtheih lai hi. Pathian in asiam tuung in nak etlawm in chia...Amah hiil-hial in hoih asak zaw hoih mahmah hi ding hi.

Pathian in hiai leitung etlawm tak mai a hamsiat in a lungsim na mahmah thou ding in a gintak-huai. Mihing’ khelhna ziak a hiai leitung etlawm mahmah hamsiat a om chih i ngaihtuah ngei hia? Nang-le-kei ziak ana hi maimah hi. Leitung hamsiat a om ahihman in hai-chi apiang di zah piangzou nawnlou a, siatlam manawh deuhdeuh mai hi. Avot-asa le thuak hak deuhdeuh mai hi. Hun hongpai di ah hiai sang a thuak-hak semlai ding hi. “Nasep agentheih huai, asa, avot” i chi-chi na a nang-le-kei khelh na ziak ana hi maimah hi.

 

GANHINGTE’N GENTHEIHPIH

Lei apiang haichite alim di bang in limzou nawnlou a, gah apiansak dizah le piang sakzou nawnlou hi. Ganhingten ahin nadi un gamteng ah vak in nek-theih nek-moh ne in hing ta-mai uhi. Ngaihtuah sau le, Eden huan a Adam leh Evi in a khelh ma un ganhingte koimah apai selou in a omna mun uah nek di nei di uh a, anek te uhle limthei mahmah ding in gintak-huai hi.

Ganhing ngaihtuahna bei chi a i simmoh mahmahte ei ziak a gentheitak a om ahi uh chih i ngaihtuah kha ngei dia aw…Mihingte Pathian’ siamsa chi in kithupi saktak in i om a, ganhingte tung ah ut dandan in i gamtang a, i that a, nasem din i zang a, i khen ek-ek seklai a...ngaihtuah le, ei ziak a ganhingten gentheihna ana thuak uh thupi lawtel hi. Ganhingte pauthei hile uh “Mihing te’n Pathian thu na man louh ziak ua kou gentheihna thuak kahi uh” chi di un agintak-huai.

 

PATHIAN’ TAPA IN SIHLOH

Leitung leh Ganhing pautheilou te’n athuak uh hunlou in, Jesu Khris Pathian’ Tapa natawm in sihloh laitel chih bangzaw na lawdeuh hi. A ngaihtuahthei adin zaw lungtang teng tawh Pathian mai a kuun-kuun mai dia hoih ahi. Ei mihingte mawhna ziak a Leitung leh Ganhing mawhna neiloute tung a ahehna sungbua a, a Tapa ei thuak taang a thuaksak a, sawi lai chih i ngaihtuah leh zaw theihsiam haksa dekdek hial hi...hon itluat ziakzaw ana hi ahi.

“Mihing bang atel hiam Thianmang” chihlouh theihlouh hi? Ei adia ahinna pia Pathian i neih hi thupi na lawmlawm e! Hichibang tel a itna gen inle genseng kei ni.

 

THUKHITNA

Ei khelhna ziak a hiai leitung in thuak loh a, ganhing mohna bei in thuak loh a, Jesu mohna neilou in sihloh laitel...Pathian in hon vaihawm khum hun di ni hongtung chiang in zaw a thangpaihna mel i mu ngam na diam maw...

I hoihlouhna bangbang a hon it tu i Toupa kiang ah hun omlai in kik nawn ni...!

(Bible: Gen.3:14-19; Rom.6: 23; 8:19-22; Isai.53:3-5; 65:25; Jn.3:16)

____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.