JONA­­

(Pathian Sepaih Manpha)

Gelhtu: LB Muan

20^th Sept. 2018

Bible a Jona tanchin a kigen khak chiang in a hoihloulam ngen in kigensek a, a hoihna kigenkha ngeilou hi. Mihingte’n hoih nalam kinei chiat a, hoihlouh nalam leng kinei chiat hi. Mihoihlou tawp a i koihpen inle banghiamlam ah ei-sang a hoih zawkna ana neisek uhi. Jona in hoihna bangbang anei kha mah hiam chih kha-nih sung vingveng kasui leh mi-ettontak petmah khat ahihdan ka musuah hi.

 

MICHITAK AHI

Jona michitak mahmah khat ana hi ahi. “YES” achih leh “YES” hi a, “NO” achih lehleng “NO” chi bilbel mi ana hi ngeingei ding hi. Pathian in Jona Ninevi khua (Israel tate melma Assyria-te khawpi ahi. Tulai in Mosul a kichi a, Iraq gam ah om hi) a thu vagen ding in sawl hi. Ahihziak in Jona in Tarshish (Spain) lam ah taimang sawm maimah hi.

Ninevi khua bel Tigris lui suahlam a om ahi a, Jona teenna apat km.1000 vel hiding ahi. Jona in tuamun a Pathianthu vagen utlou in km.4000 vel a gamla lam ah Pathian taimangsan sawm maimah hi.

Jona michitak ahi chih a kilatna bel a utlouhna ahoh ding a Pathian in asawl hun in, kamsiam in Pathian kiang ah, “aw ka hoh ding” le achi hetkei. Pathian le a khem sawmkei. A minpu lel a Ninevi a vahoh leng a sawm tuankei. Pathian nasep aminpu lel leh thumanna maimai in a sepsawm kei…Long a atuanpihten “Hiai thil hoihlou nang ziak a hongtung mah hia?” chia adot hun unle zuau agen kei. Thudik mah genkhia a, Van Pathian, tuipi leh gam bawltu Pathian apan taimang ahihdan a genkhia hi. Huchi in huai long a atuanpih gam tuamtuam apat hong kipante, nam tuamtuam, bawltawm leh ni-le-khat khawng bete’n Jona’ Pathian pen Pathiantak mah ahihdan hon theikhia ua Pathian hon biakloh uhi. Pathian na asep chiang inle nasatak mah in pang a, lohleng lohching mahmah hi.

 

MILUNGTANGPHA AHI

Tuipi a paihle laulou a lungtangpha ahi. Sih a maituah hun natawm a leng laulou leh linglou mihing ahi. Nga-pi gilsung ah nithum leh zanthum a om a, a kisik hunchet kigenlou hi. A ni-thum ni a akisik pat ziak a nithumtak nga-pi gilsung a omman hikha ding hi. Hichituk a lungtangpha leh lauh neilou ahihziak mah a Pathian in Ninevi a sawl hikha ding hi. A melmate’ khawpi Ninevi ah sihding lau hetlou a Pathianthu va kikoupih ngam mihangsan leh pasalpha ahi.

 

PATHIAN TAWH KIZOPNA HOIHTAK NEI MI AHI

Thukhunlui hunlai in Pathianthu Jawlneite kiang ah a hongtun chiang in Pathian’ gen bangbang genkhe pahsek uhi. Himahleh Jona huchilou maimah hi. Pathian thumanglou Jawlnei omsun chu Jona ahi. Pathian nial ngam leh Pathian tung a athangpaihna gen ngam Jona ahi. Toupa tung a ahehna teng genkhesuk zialzial ngam Jona ahi (Jona 4:1-11).

Jona in Pathian kinakpih ngam mawk i chih chiang in suut-thamching khat om hi. Pathian tawh a kizopna uh a hoih petmah chihna ana hi ahi. Pathian tawh Jona kihouna hoihtak a sim a, i suut leh lawmta kihou mah bang uhi. Jona tawh Pathian kizopna a hoihluat ziak a Jona in a utteng Pathian kiang a genkhe ngam ana hi maimahdan ahi. Jona leh Pathian’ kizopna thuk mahmah leh hoih mahmah ana hidan ahi.

 

THUKHITNA

Jona mi ettontak, Pathian adia suanhuai leh pasalpha ahi. Jona hinkhua apan muhtheih om bel hiai ahi…Pathian’ sapna za a Pathian nasem i hihleh chihtakna tawh Pathian na sepding ahi. Minhoihna di lel tan hiam, sum muh nadi mai hiam ahihkei leh thumanna maimai leh a kilom tan lel a Pathian na sepding hilou hial ahi.

Pathian na i sep ut keileh seplouh mai ding ahi. Sem dia i kisak vanglak leh sih laulou a pan ding ahi. Mahni meetna ding leh minhoihna di tanlel hiam a sep di hilou a, giahna di neilou leh ann nek di neilou dinmun tanpha a i omkhak lehle honsampa nasep gin-omtak a sepding ahi. Mittui luang zungzung a, sisan kai nengnung a kalsuan a poimoh lehle nung heilou a Pathian adia malam nawt ding ahi.

Tuateng ban ah, Pathian tawh kizopna hoihtak neilou a Pathian nasep chih omtheilou hi. Kizopna na-ran leh kizopna maimai hilou a, Pathian tawh kizopna thuktak leh kiptak neih ngei-ngei ding ahi. Niteng, hunteng a Pathian tawh ton a lawmta bang a kipolhtheih poimoh petmah hi. Pathian pen lawm bang a kithuahpih theihluat hilua ahi.

Atawpna din, Jona bang in mite’n na hoihna mulou a na hoihlouhna chouh mu a hon gengen uh le a hikha maithei…ahia, Pathian lawm bang a pawl mi na hih a, Pathian adia a sepaih manpha na hihleh tuapen kan a thupi khovel ah bangmah dang omlou hi…

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.