KI IT NI

Gelhtu: LB Muan

12^th Dec.2017

 

Aak a omkhawm tuung un kitutu mahle uh sawt a hong omkhawm chiang un ki-ngai deuhdeuh uhi. Mihingte bel i kimuh tuung in hoih taktak a kihou in i kihoih bawl mahmah uhi. Ahihziak in sawt i hong omkhop chiang un kining, kituaklou, kina, kibawlgenthei leh adangdang tampi hongpiang mawk hi. Khovel ah ei chouh a kikhawsa theilou ahihchiang in i ompihte hoih in hoih keile uh bangchi it ding hiam chih suutkhawm zual ni.

 

[1] A KIKHENPAH DIDAN IN NGAIHSUN LE

Mundang a hon zinsan di hiam ahihkeileh hon paikhiaksan dite bel hoih taktak in kibawl a, a duh uh kihuansak in kamdam in hoihtak in kikhakhia hi. Huchibang in hon dampih sawt nawnlou dite leng a lunggulhte uh kihihsak teitei sawm a, tawmchik a damsung uh kipaktak in kikoih sawm hi. Mihing bel sihhun ding a kitheihlouh ban ah kikhen guih thei gige kihi ahi. Laizilna ziak hiam, sepna ziak hiam ahihkeileh a hoihlam-le-hoihloulam banghiam ziak a gintaklouh pi a kikhek guih thei kihi gige ahi.

 

Huaiziak in i sungkuante, i ompihte ahihkeileh i lawm polhte pen in hon omlouhsan guih thei gige ahihdan uh lungsim ah koih gige le bel hoih taktak in kihoupih ding a kinak, kisia, kitheisiamlou chihte omlou ding hi.

 

I ompihte bangchituk in hoihlou a ompih hak ahihtak ua leh leng a paikhepah ding ahihkeileh a omloupah didan in ngaihsun theile bel kithuak hamham ding a, huchi’n kituahna leh lemna omthei ding hi. Amaute i it theihna di’n bel a kikhenpah didan in ki ngaihsun le haksa hetlou ding hi.

 

[2] A NU-LE-PATE UN A IT DIDAN UH NGAIHSUN LE

I nu leh pate’n hon itdan i theichiat ding. I hoih kei aleh leng i hoihlouh dandan in hon it tuntun uhi. Midangteng in hon taisan nung un leng i nu leh pate’n hon taisan ngeilou uhi. Bangchituk in sual lele “bawi” hon chithouthou uhi. I hoihlouhna teng mulou mahbang in hon it uhi.

 

I ompihte, seppihte, laizilpihte leh lawmvualte pen hoih hetlou, polhhak leh thuak-hak mahmah ahih ua leh leng it didan ngaihtuah tenten ding ahi. A nu-le-pate un a it didan uh ngaihtuah le…i nu leh pa’n ei hon it bang ua amau le anu-le-pate un itlaw ding uh ahihdan i lungsim ah ngaihtuah le i hehna teng mangthei hi.

 

Mibang chiahlou, lawmte lak a ana mawl deuh, mi phazoulou ahihkeileh khel mahmah a thuak-hak isak mahmahte leng amau nu-le-pate mit in en leng it huai mahmah ding uhi. Ei mit a i et sungteng it haksa mahmah ding ua, ahihziak in amau nu-le-pa mit apat en leng it haksa hetlou ding uhi.

 

[3] PATHIAN IN AMA’ BATPIH A ASIAM AHI CHIH NGAIHSUN LE

Pathian in nang-le-kei Ama’ batpih a honsiam bang in miteng leng Ama’ batpih a asiam ahi. Kuahiam i vabawlsiat hiam ahihkeileh i vasimmoh leh bel a siamtu Pathian simmoh chihna suak ding hi. Athulimlou, akhel mahmah, melse deuh, aveng chiahlou, mawl petmah i chihte leng va muhsit a simmoh mawk ding hilou uhi. Pathian in Ama’ batpih a asiam ahi. Hiai lungsim ah koih gige theile bel miteng ki-it thei ding a, kuamah kibawl genthei ngamlou ding hi.

 

THUKHITNA

Bible ah thupiak khauhtak mai piak in i om.

Phu nala ding ahi kei, nachipih suante muhdahna napai ding ahi sam kei, nang na ki-it bang in na innsak-innkhang na it ding ahi zaw: Kei TOUPA kahi (Levitikas 19:18)

 

Nangmah na ki-it bang in na vengte na it ding ahi, chih thu kamkhat ah dan thu tengteng kimsak in a om ngal a (Galatia-te 5:14; Matthai 22:39; Marka 12:31; Jakob 2:8)

 

Ken zaw ka honhilh ahi, na melmate uh it unla, a hon sawite thumsak un (Matthai 5:44)

 

Simtute Toupa’n hon vualzawl chiat hen!

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.