KITEENNA THUAHTHUMTE

Gelhtu: LB Muan  M.Th (Counselling)

Dotna in panle…Pastor in Biakinn a mipite mai a hon kiteensak khit apat nupa pumkhat kihi ngal ahi diam? Saptuam danlou a aguk a ana kineite lupna tunga alupkhawp khit uapan pumkhat hi ngal uh ahi diam?

Mi tampiten ahinkhua ua a ngaklah mahmahte lak ua khat chu Ji/Pasal neihhun ahi. Damsung I itpente tawh zatkhawm nuamchiat dia gintak ziak in pianna nu leh pa natawm kipai khiaksan in itpente tawh kikhawsa a, anuam ahak thuak in damsung kizang hi. Hiaibel Pathian deihdan mah leng ahi.

Ji/Pasal neih ki-ut chiat a, himahleh kiteenna kichi bang hihiam chih atheilou mi tamtak om a, anawp lam chouh ngaihtuah a ahaksa lam phawk khalou hunkhop om tham hi. Ji/Pasal neihkhit chiang a “hichidi kisalou a” chia kisik mahmah le tamtak om...Bible a Pathian in Ji/Pasal a kineih didan, pasal/ji mohpuakna agente phawkkha hetlou a hinkhua zangle kitam. Tua ahihman in mite ettontak leh Pathian mitmuh a nupa hoih/lohching ihih theih nadia KITEENNA THUAHTHUM a kiteen poimoh hi...

 

1. TAKSA (PUMPI) KITEENNA

Ji leh Pasal a kineihna tawh kisai Sawltak Paul in chiangtak in ana gen hi (1 Corinte 7:2-4). TAKSA KITEENNA ichih chiang in Pasal khat tawh Numei khat hong kigawm ua pumkhat hong hi uh chihna ahi. Numei in a taksa apasal adin alaan khia a, huchimah bangin pasal in aji adin ataksa alaan khia hi. Nih ahi nawnta kei ua, khat ahong suak ta uhi (Matthai 19:6). Hiai ahi taksa kiteenna. Pasal in aji alungkim sak a, Numei in apasal alungkim sak pen Bible deihdan ahi. Khenkhatten amah alungkim leh aji/pasal lungkim leh lungkim louh pen ngaipoimawh lou uhi. Tuate chu mahni angma sialte chile genkhial kholkei ni, baan ah mohpuakna zouloute ahi uh uhi. Ka taksa ka Ji/Pasal a ahi, kei deihdan chouh a gamtaang thei di kahi kei chihtheih poimawh mahmah hi.

Mi tampiten ‘TAKSA KITEENNA’ ngainep in, Aji/Pasalte uh tung a mohpuakna aneih uh kitheih khembawl in a utdan teng un taal uhi...hichibang a koppihte thangtatsan (aangkawmsan), sulungkim lou (a ji/pasal lungkimtan a pawllou), ngaihsaklou (ji/pasalte taksa utna ngaihsak ngeilou) chihte pen Bible deihdan hihetlou hi. Hiai ‘TAKSA/PUMPI KITEENNA’ zouloute innsung hoih/nuam chih om ngeilou himhim hi. Tua ahihman in Pasal in ‘ka ji a kahi’ a chih a, Numei in ‘ka pasal a kahi’ achih theih gige pen poimohlua ahi (1 Corinte 7:3-4).

 

2. LUNGSIM KITEENNA

‘Lungsim kiteenna’ ichih chiang in nupa in lungsim khat pu-khawm chihna ahi. Thupukna lakhawm, khat lunglutna khat inle lunglutpih, hihdi kidong tuah, nangsai keisai chih omlou a thilteng a kithutuak, ngaihdan akikalh hun ale awl a kikum in thutanna bawlkhawm chihte khawng ahi. Mi tamtak ‘TAKSA KITEENNA’ chouh phawk a ‘LUNGSIM KITEENNA’ lam phawkkha hetlou leng om zel uhi. Tulai khovel ah taksa chouh kiteeng a lungsim kitengkha hetlou nupa tamtak om hi. Huchibangte kiteeng sawt theilou ua, kikhen pah sek uhi. A kikhen kei ua leh leng lunggimtak in khawsa uhi. Pasal khenkhat kipasalsak in jite mahni thuthu a kaihsawm, ahih keileh numei inle kei numei chituanlou in ka hinkhua ka thuthu hon chih chiangin lungsim kiteenna chih omthei hetlou hi.

Lungsim kiteenna a omtheih nading in kitheihsiam tuah poimoh mahmah a, mahni lunglutna kia a paisawmlou a koppihte lunglutna zuihzel pen adamdawi hoih mahmah ahi. Lungsim munkhat pu-khawm a, hih dite kidong tuah dialdial thei nupate innsung bel genle ngailou in anuam di chih theihsa ahi. Nupa bel pumkhat himahleh ngaihdan akikalh hun om theitham a, huchibang hun a zaidamtak a thupukna lakkhawm pen poimawh hi. Taksa chouh a kiteng a lungsim a kitenglou nupate pen kiteng taktak hilou in 100 lak a 30% khong lel kiteng chihna ahi. Lungsim kiteenna nei nupaten khovel nuamsatak in zang uh a, innsung hileh khotaang ah maitai thei gige uhi.

 

3. KHALAM KITEENNA

‘Khalam kiteenna’ pen mi tampite nelhsiah khat ana hinawn hi. Khalam kiteenna ichih chiang in Jesu a hotdamna neituak kiteng ichih nawpna ahi. Bible in gingloute tawh hakkol puakkhop louhdi ahihdan ana gen khauh mahmah hi (2 Corinte 6:14,15). Hotdamna nei khat toh Hotdamna nei nailou khat kiteng chih pen Bible deihdan ana hihetlou hi. Hotdamna nei tuak hong kiteen chiang un khalam kiteenna omthei pan a, Pathian inle hiai mah ahi adeih.

Piangthak tuak kiteen a Kristian innkuan hoihtak bawlkhiak pen Pathian deihdan ahi. Nupa khalam a kiteenna a omlouh chiang in innsung hamhaih ut mahmah a, kinakna leh kitheihsiam louhna tam hi. Khalamsi khat leh khalamhing khat bel zot ut nalam kibanglou a, hakkol puakkhop chih pen haksa ding mah leh ahi theilou khat ahi. Ahihhangin piangthak tuak ahong hih chiang un, azotna lampi uh kibang a nuamtak in ton helhel thei uhi. Huchibang nupate pen khovel a minuamsa ichihte lak a khat ahi uhi. Bangkim ah Pathian kiang a zuankhawmthei gige ua, mi hampha ahi uhi.

 

THUKHITNA

Kiteenna ichih ngaihdau di ana hihetlou hi. Ideih mahmah ahihkeileh ideih khollouh neikha ihihtak lehle hiai atung a kigen ‘KITEENNA THUAHTHUM’ te a kiteen poimawh hi. Damsung nuamtak azat I ut a, innsung nuam, nupa kituak ihih ut aleh bel hiai ‘KITEENNA THUAHTHUM’ te a kiteen ding ahi. ‘Taksa, Lungsim leh Kha’ teng hong kiteen chiang in pumkhat hi taktak pan chouh ahi.

Hiaidan kiteenna thuahthum zuite innsung ah kinakna, kitheihsiam louhna, lungkhamna ichih ten mun anei kei. Innsung leh khotaang ah mite ettontak hinkhua azang khethei ua, anuam ahaksa hun ah leng ahi bangbang thuaksiam uh a, kikhamuan tuah in pangkhawm uhi. Nupakal, innsung leh khotaang a hinkhua nuam izat ut a, damsung a kipaktak a I om utleh hiai ‘KITEENNA THUAHTHUM’ te a kiteen ding ahi. Huchi in Pathian vualzawlna leng hong luanglut ding hi!

Mi tampitak ten taksa/pumpi kiteenna chouh phawk in lungsim leh kha kiteenna pen phawkkha lousek uhi. Pastor in mipite mai a “nupa ahita uh” achih apat nupa pumkhat dan in kipom ngal hi...saptuamdan lou a kineite zankhat hun azatkhawp uapan pumkhat in kikoih hi...hiaite bangtan in adik dia? Pumkhat hi taktak ngal ahi di uam? Nupa 100% kiteeng (pumkhat) ahih theihna di un bel atung a igen kiteenna thuahthumte a kiteen ding ahi. Hiai ah kuamah hong kigolh thei mawk kei a, nupate khut ah ki-nga pumlum ahi. 30%, 50%, 90% kia kiteng hilou a 100% kiteng (pumkhat) hiding in Pathian in hon vualzawl chiat hen!

 

 ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.