TULAI HUN ADIA POIMOH

Gelhtu: LB Muan

Innsung, khotaang leh saptuam ah hoihna gen di mawngmawng kinei nawnlou a, bil ah thuhoih leh kipahhuai zak di om tawm mahmah ta hi. Bang chibang khovel a kihing hita ahi diam? Honsiam tupa’n van apat hon et chiang in bang ngaihdan anei mah diam maw...

Innsung hoih leh nuam kideih chiat lah se deuhdeuh. Piangthak kichi chiat lah khamiitna bei deuhdeuh. Ahoih deihlou ki omlou lah ahoih hih muh di kuamah omlou. Pathian deihdan theilou ki omlou lah a zuitu di ki om nawnlou...hichibang dinmun ah a kiding ta, siatna lah uang deuhdeuh ahihman in maban i maban ding gen haksa mahmah hi.

Mimal, Innsung, khotaang leh saptuam in tuhun a i-poimoh mahmah bangzah hiamte hiaite ahi.

 

1. PULPIT SERMON HILOU IN KISINSAKNA HOIH

Pulpit sermonte a poimoh kei chihna ahi zenzen kei. Khalam khanna di leh hinkhua hoih neihna di’n poimohlua hi. Ahihziak in kuan pulpit a sermon kigente a zui ua? Bil khat ah lut a khatlam ah pawt maimahta hi...Saptuam mipite’n pulpit a thu kigente zuih dia le ngaihtuah nawn lou...Pastor pa’n a mohpuakna hih ahi chih dan a kila maimahta, sawt agen leh bang ning zawmah, a khenten ihmutsan lai. Kikhawm atam zawten Biakinn kong i kaan khit chiang a pulpit a thuhoih pipi kigente ki mangngilh manta...

Hichibang gingtute dinmun ahi. Pulpit sermon pen tawpsan di chi i hi zenzen kei, ahihziak in pulpit sermon chouh a saptuam kikeptheih di hi nawnlou hi. Saptuamte Pathianthu theilou om nawnlou, Pastor pan agen ma a le agen di teng theikhin tate i hi, azui peihlou i hilel uhi. Huaiziak in kisinsakna lam poimoh i hi. Innsung kepdidan, tate etkol didan, tulai khovel a khangdawnglai leh tuailai tamtakte buaina tuahte apan suahtak didan, nupakal hinkhua zat didan, tekpi tekpute kep didan, zi-le-pasal zawn didan, innsung a nu-le-pate mohpuakna chih leh adangdang tampi kisinsak ding ahi. Hiai Pastorpa mohpuak ahi tuam kei a, saptuamte mohpuakna ahi...khalam thil chouh hilou a salam a i-thil tuahte le i buaipih ding ahi. Salam a i-buaina tuamtuamte a hong veng chiang in khalam ah le kihat theipan chouh ahi.

 

2. SAPTUAM BUILDING HOIH TAKTAK HILOU IN COUNSELLING CENTRE

Tuni chiang in saptuam le Government mah bang in hausa mahmahta hi. Sum-le-pai tawh kisai a saptuam in ahih ut banghiam hih zawhlouh chihte omnawnlou hi. Saptuam building leh Biakinnte hoih deuhdeuh, lian deuhdeuh, thupi deuhdeuh, hilehle a kikhawm di tawm deuhdeuh, khamiitna kiam deuhdeuh, innsung kise deuhdeuh, khotaang leh saptuam le se deuhdeuh...bang ziak ahi di?

A poimawh mahmah khat i kitheihmawh bawl gige ziak ahi. Huai chu Counselling Centre ahi. Saptuam Office di, Pastorte Quarter leh adangdang adin sum tampipi kiseeng sek a, hilehle Counselling Center chihkhawng lungsim ah le omlou hi. Saptuam in Pastor i neih leh hun kisa, Counsellor neih di lungsim a kigeelkha mahmahlou.

Counselling Centre ah Counsellor in a nasep khiat pen Pastorte hihtheih thilte hi mawklou hi. Buaina i neih chiang in i lungsim ah Pastorte hong kilang pah in amaute kiang ah kigenkhe utsek hi. Ahihziak in Pastor tamzawte’n mi Counselling didan ana zilkhaklouh ziak un hun tamtak ah saptuam mipite buaina panpih theilou suak uhi. Pastorte kiang a thuguk gen ngamlou mitampi le om uhi, aziak bel thugenna ah Pastor pa’n agen khiakkhak di lau uhi. Khenkhatte’n lah Pastorte a zahtak ziak un vahoupih ngamlou uhi. A khente’n lah ‘ka buaina Pastorpa tantan va hilh di zaw...’ chi a lunggimtak a khawsa le tampi om zel hi. A khente lah Pastorpa’n ana tai mawk di a lauh ziak ua va naih ngamlou bangle om zel uhi.

Counsellor-te kiang ah bel kuapeuh in thuguk genkhe ngam in agen le nuamsa uh hi. Counsellor ten a Clientte uh thuguk azi/apasalte kiang nasan ah gen mawklou uhi. Counsellor toh Pastorte teh theih mawk di hilou uhi. Pastor-te pen saptuam mipite’n Counsellor dan in ki-en mawk a hilehle dikkhinlou ahi. Amau pen in khalam thu hon kumthei le uh le Counsellor-te daan in i buaina teng hon suutpih theilou uhi. Counselling Centre leh Counsellor i neihlouh ziak un Pastor-te na sah mahmah a, alehlam ah hehpihhuai petmah uhi.

Counselling Centre kinei leh buaina nei peuhmah in va kizuanpah geihgeih ding a, innsung buaina, nupakal buaina, laisimna a buaina, nekzonna a buaina, maban di theilou a buaina, zi-le-pasal zonna a buaina, khalam a buaina, tate kepna a buaina, mimal a buaina, khotang a buaina chihte hong vengthei ding hi. Tu in bel i haksatna genkhiat nadi leh kupdi kineilou a, en kipaw kenkun mai in lunggim taktak in hinkhua kizang hi...mimal i buai ziak a innsung buai, innsung hong buai chiang a i-khotaang hong buai, i khotaang hong buai chia saptuam le hong buai...hiai ahi i tulai dinmun uh.

 

3. KHOTAANG KITHUNUNNA HILOU IN INNSUNG KITHUNUNNA

Khotaang selawta i chi ua, pan tuamtuam i lasek uhi. Pan i lak nasat zawh khop leh se deuhdeuh le abang zaw hi. Pan i lakdan diklou ahi diam ahihkeileh apan latute diklou?

Khotaang hoihna ding in innsung ahoih masak ngai hi. Innsung ahoih nak leh khotaang amah leh amah a honghoih mai ding ahi. Ei pen in abul a panlou a aleklam apat i bawlhoih sawm ziak a dik seklou ahi.

Innsung ah bangchi in i kibawl hoih dia le? Hiai pen nu-le-pate mawhpuakna liauliau ahi. Nu-le-pate’n a mohpuakna uh atheih mahmah ua, Pathian tawh pang a ahon bawl masak uh ngai hi. I sisan a piang i tate chu kuamah kepdi hilou in ei mahmah in i kep a mihing hoih i suah sawm ding ahi. A khenten ompihte ahihkei leh api-le-pute uh khut khawng ah koihmawk uhi, i ta etkolna ah chu ei pen in ma i kaih ding ahi. Pa-le-nu pangkhawm a tate hon kep ua innsung hon bawl chiang un hoihlou chih omlou hi.

Innsung ahong hoih chiang in khotaang leh saptuam hong hoih ding a, salam leh khalam ah kikhang thei ding hi. Mihing salam leh khalam ah khan ngaituak hi. Khalam a pichinglou leh naungek den i chih dan in salam ah leng pichinglou a naungek det theih ahi. Kum chouh kibehlap a taksa letdan chouh a kikhekna om in lungsim ngaihtuahna, lawm polhna, innsung khosakna, lunggeel siamna, zaidamna, leh adangdang a piching theilou chih mitamtak om hi. Hiaite pen khang diklou ahihkeileh khang nadi teng a khanglou chih ding ahi uhi. Huaiziak in nu-le-paten tate khalam, salam, lungsim ngaihtuahna, khuak pilna, thil theihsiamna leh adangdang a piching khe dia akep uh poimawh ahi. Huchibang a nu-le-pate’n tate hong kep pichin ua leh khotaang ah mipiching ngen, mihoih ngen om di chihna ahi, huchi in khotaang ah mipiching ngen om leh bel siatna i chihchihte gen ding omlou ding hi.

   ____________________________________________________

#  Na phattuampih leh midangte khualna in WhatsApp leh Facebook chihte ah ana SHARE sawn in. 

# Article ki post thakte nana muhzelna ding in hiai atung a taklampang a "Follow" kichi pen CLICK in.