NEBC Mission Field HQ, Birtamode, Nepal.
Hongtungpah ding Christmas hun manphatak a i zatchiat i kideihsak a…Nu-leh-pa tawh Innkuan a i khua/Biakinn a kikhawm a, saptuam in program abawl bangbang a innkuan atel a, saptuamte tawh zatkhawm chu atangpi a i zatdan sek leh i utdan/duhthusam hiding in kagingta hi…Nang tutung Christmas bang chidan azat na sawm a?
Ei gam a ka omlouhna kum 15 bang ahi thei tei tahi. EBC Saptuam in mission field mun tuamtuam ah i nei ua, ka pasal leng semtu missionaryte lak a khat ahih man in mission field mun tuamtuam ah kana omkha uhi. Ka omkhiak tung kum un Christmas hun hongtung ding pen ka lungleng in innlam ka ngai mahmah mai a, mission nasepna mun a mite'n lah lasak/lenkhom chih khawng theilou uhi. Ban ah, ala ding leng neilou ua, ei sinsak late kia kisa hi...“Christmas hon bangchi zatpih mahmah di uh adia aw” chi in kalung buaigu lawsim a, gingtu kou tawh sim a inn 8 kia kahi uhi.
Christmas lop didan saptuam in a genkhawm (committee) na ah sa (voksa) kg.30 khawng huan di hon gen ua, lamdang ka salua a, “oi lawmlawm, sa hai chi na mai hang e” kachi a...Sum (Christmas) thohlawm thoh didan kagen khawm chiang un tam kasa lawzel a...Abang-abang hi leh ei a omtung kihi a, ana hihdan uh hidi hiven ahun hongtun chiang in kithei mailou di hia…apau-aham i theihlouh tawh mi chih dandan a ki omphot mai chu ahi. Annhuan/tuanvai di kuate adia aw chih khawng kathei ut lawzel a...ahun a theih di himai kachi nawn hi.
A thugen di kapa uh ahih chiang in kichei deuh in ka nupa un kikhawm din kakuan ua, ka saptuamte uh bel a-numei, a-pasal in annhuan didan ngen in hong kuan uhi...“Kikhawp hun nailou di hia” chia i dot leh “hun ta, kikhawm dia hongkuan i voi” honchi ua…ka lungsim ah “bang chidan a de aw” kachi a…eilam dan a vanthak, puanak, khedap chih khawng naupangte bek in hon silh di uh kana sak leh hong kuan dandan ua kikhawm in kikhawp tawp in numeiten annhuan in pasalten meh huan ua, saptuam memberteng tuanvai in kaki pei sau-sauh mai uhi. Buh-le-meh huan a buai khaloute tuitawi, singpi hawm leh Annnek nadi nahtangteh latu khawng a pang in saptuam mi tawmchik himahleh kithutuak tak a pangkhawm in nuam kasa mahmah uhi. Annhuan kazawh tak un khawsung mite chial tawh, chiallouh tawh Ann ne din hongkuan ua, kou gingtuten Christmas Annkuang amaute adia ana lui in amaute’n anek zawh nung un kou kane pan uhi.
Hiai a kipan in mission field ah Christmas hichi zat di mah ahi vele...kumnawn chiah Pathian in dam a hiaibang hun hon muhsak nawn leh Salam-Ann kia hilou in ginglou mite kiang ah Khalam-Aan leng piak didan gel di ahi ka kichi ua, kumbul apan kumnawn Christmas hun ding ngaklah takmai in ka gal-et uhi.
Hun hongpai liam zel a, Pathian hoih nate leh ven nate ziakin ngeina dan in a kumnawn December chu dam in hon musak nawn a, kum paisa a Christmas hun zatdan lungsim a koih kawm in TUKUM CHRISTMAS chu nikum sang a ginglou miten a hamphatpih theih zawk didan ua zat ut huai chi in hiai hun zat didan ngaihtuah in innlam lunglen huai simthou mahleh ginglou mite awlmohna leh amaute adia vualzawlna hih ut huai sa in hiaibang chance khah suahlouh a saptuam mi tawmchik tawh zatkhawm a, ginglou mite tanchin hoih theihsakna hun azat ding hoihsa in thupukna kahon la uhi. Pau-leh-ham theilou chi nawnlou in Christmas zat didan kon geel uhi.
A tangpi in Assam lak a om namdangte leh i mission field a miten laam (dance) ngaina in a thupi ngaih mahmah uhi. Program banghiam aom chiang in a laamthei leh laamsiam deuhte hong laam zel ua, huai in program pisuak sak mahbang atheih in om hi. A tamzaw lunglutna ahihziak hiding in kagingta hi.
Tuate lungsim a koihkawm in kou leng Christmas hun zatna di ah laamsiam saptuam sung a mi khenkhat leh lasak bang leng ngaina mahmah uh ahihman un lasa siam khenkhat chial in leh mohpuakna pia in Christmas invitation card khawng bawl in khawsung hausa leh political leaderte leh mi poimoh tuamtuam chial in dak chiam nei in program zangdin kong kisa ta uhi.
Agam paidan dungzui in chialte adin vaidawn (welcome) na in Gamasa (dial puanbat) oksak in singpi leh nek ding ama ua lui in a dakchiam hongchin tawh kiton in khawsung mite sapna le hi kawm, Pathian phatna in microphone (loud speaker) zangin lasasiam lasa dia chialte la kasa sak uhi. Hun bangtan hiam zawh in laamsiam (dance) ten hun honzang nawn ua, lasakna leh lamna a Pathian phatna lah hi, mi sapkhawmna lah hi, huchi’n mi hong dim mitmet uhi.
Mi atam san laitak in Christmas massage genna hun in kizang ua, ngai ut in lunglut thei mahmah uhi. Huchibang a lunglut taka Pathianthu a ngaih uh i muh leh tha hon pe mahmah mai hi. Tanchinhoih chii tuhna in hiai hun kazang uhi. Thu a kigen zawh in gingtu omteng in Christmas Annkuang gingloute kiang ah kalui nawn uhi. Manpha kasa a, nuam leng kasa mahmah mai hi. Huai apan in Christmas hun a saptuam piching Pastor omtheihna saptuam a Christmas hun zat sang in mi tawmchik biakinn le om nailou, gingtu khat-le-nih kia khawng omna a amaute pansan a akim a ginglou mite chial a Jesu Christ iitna thu leh tanchinhoih chii tuh ka utleh duhthusam uh ahi ta hi.
Huai ziakin kuahiam mission field a Christmas hun hongtung ding ah innlam ngai a lungleng taka om bang i om khak leh kihan thawnna lah hi, kana experience chihdan a kon gelh ahi. Pulpit tung a thugen siam mahmah Pastor/Elderte thugen nava ngaihkhiak sang in hiai hun a ginglou mite kianga iitna Aankuang na valui a Jesu iitna “chii” nava tuh manpha kha zaw maithei ahi.
Christmas hun pen khovel nopsak nate inle a zattheih a, nu-leh-pa tawh innkuan kimtak a zat leng ut huai in a lunggulh huai mahmah mai hi. Himahleh ei mission field a omte adin…“Pal zatam ten Toupa pampaih in simlei pallunte zou zong leh, ken bel Toupa din zang ning e...” chi’n thathak la in gingtu omlouhna a i omkhak leh leng lungkelou in panla thak ni aw...
Simtute, na vek un Christmas i omna mun chiat ah Pathian vualzawlna tawh zang di’n Toupan hon ompih in makaih hen aw! Kakipak…Christmas zatnuam!
____________________________________________________
# Na phattuampih leh midangte khualna in WhatsApp leh Facebook chihte ah ana SHARE sawn in.
# Article ki post thakte nana muhzelna ding in hiai atung a taklampang a "Follow" kichi pen CLICK in.
No comments:
Post a Comment