KEI GINNA LE HAT HETLOU SAM AHI

Gelhtu: LB Muan

21/01/21

Mi khenkhat ten “Ginna a hichia kalsuan na thupilua” hon chisek ua, ginna hattak nei didan khawng a hon gingta uh chu ahi ngei di uh. Hiai bang kampau ka zak chiang in a dawn didan kathei sek kei, “Pathian in noule kei kalsuan bang a kalsuan din hon sawl leh noule khaloh neilou a kalsuan thou ding in kon gingta” chih khawng ka dawnna ahi tangpi.

Mite’n ginna hattak nei dia hon koih lai un ken bel ka ginna huchitel a hat inle kakoih kei. Midangte ginna sang a ginna hatzaw nei inle ka kikoih kei. Mite’n hon theichiang kei ua huaiziak a ginna hattak nei dan a hon koih uh hizaw din ka gingta. Kei ginna le hat hetlou sam chu ahi, ka ginna ahat zawhlouh ziak in Toupa tung ah ka lungtang ka sunbuak hun a tamlua. Naupang bang a Toupa mai a ka hai kah hun le atam. Kuamah theihlouh a aguk a mittui ka nuul hun le atam. Maban bangchi di chi a am-hai a ka puk dek hun le atam. Kei ginna le hat hetlou sam chu ahi.

Thudik zaw hiai ahi, Ka ginna a hat ziak ahi kei, Toupa sawlna ka nial ngamlouh ziak ahi zaw. Khaloh tampitak sang a Pathian na sepna di le aom tham, ahia Toupa thu zuilou a Jona bang a leh-tai kahih khak ding ka lau a ahi. Pathian in sem in ahon chihpen semlou a, kei sep utpen ka sep khak ding ka lauh ziak ahi zaw. Pathian mel ka muh chiang a apahtak ka loh khaklouh di ka lauh ziak ahi zaw. Toupa thumanna a kalsuan hamham hizaw kahi.

Hichibang a nasep chu a baih liai kei, agen zia le aom kei. Lungsim tawldamtak a om hun a vang petmah. Khatawp chiang a khaloh honglut di muang a Pathian nasemte a eng huai hun aom sek.

Hun teng in tukha bang a kichi dia aw...? Khanawn bang a kichi dia aw...? Sponsor tamlou chik omte bangtan hongpang di ua aw? Tukha a ki daihzou diam chihte khawng in lungsim ngaihtuahna teng aluah dim sek. Lungmuangtak a om ki sinzel mahleh ahi thei taktak kei. Ka gensa bang in kei ginna le hat hetlou sam ahi. Pathian thumanna a kalsuan hamham hizaw kahi. Achang in Pathian nasem sapsap din vangsia ka kisak hun bang le aom tham, huchilou kaal inlah Pathian nasem dangte sang in hampha ka kisak zawk hun le atam zel.

Sponsor khenkhat pangzou nonlou a hon tawpsan aom chiang in ka hu bang asam mai. Sponsor tawmchik petmah ten kiam lam ahon nawt chiang un lungmuangtak a kalsuan chih aom thei taktak kei. Khakhat a sum honglut zah mi khenkhat te khakhat zu man zah le apha kei di. Hilehle Pathian in hon zatpih a, hon ki daih sak zel. Ahia sum a omlouh ziak in sep ut tampitak kisem theilou zel hi.

Sponsor zon didan le a kithei kei, nasepte report piak theih chi le ahi kei a huaiziak in paktatu di leh sponsortu di Pathian in hon sawl keileh mihing in zon muh ding ahi kei. Tua sponsorte le Pathian in hon kaih khawmsak ahi. Tulai khovel ah mite’n Pathian gam adia sum athoh di chiang unle pahtawi a aom na ding uleh mite theihna mun khawng lou ah athoh utkei uh. Na poimoh tak sepna ding hileh le kuamah phawklouhna mun ah sum thoh ut a vang petmah. Pathian in sponsortu hon piak te bel mi chitak leh Pathian it ahihban uah mite theih le utlou a, aguk a hongpang khawng ahi ua ka kipahna alian.

Sponsortu atam louh ziak in Pathian in sponsor hon piak beh na dia thum din kaki sadek sek a, hilehle ka thum thei kei. “Toupa sponsor hon piak beh in...” ka chih ma in Toupa aw ka za manzel... “Kei hon muanglou nahi hiam? Kei na sponsortu ka hihleh bang ahia na lungkham, Kei sang a mihing muang zaw di nahi hia?” chi in Toupan hon houpih zel. “Ahi mah ve maw” chi in kipahthu gen in ka thumna ka leh zawh maizel.

Pathian zaw kei hon sponsortu leh anak-bulpi ahi. Hiai zaw ka thei, hilehle mihing a ki hihman in hun tamtak ah lungsim a thawmhau theilua. Diip bang a hawm, ihmut abuai hun le aom, ji-le-ta en a lungsim aguk kah hun atam. Tuabang hun ah Toupa’n hon houpih zel a, “Kei hon muanglou nahi hiam?” hon chizel, “Ahi mah ve Toupa, hon muang mah ing e, nang ka kiang a na omleh poimoh dang bangmah ka nei kei. Kaw-khuk taw ah om leng le nang ka kiang a om di hi chin a, haksatna tawpkhawk pal leng le nang hon palpih di hi chin a, nang ka hinkhua a tung dia na phal bangbang tungsak in” chi in ka thumna ka zouzel.

Achang in Toupa mel muh kal ka ngaklah tuntun, achang inlah Toupa adia bangmah thupi semsuah nailou kahihdan khawng ka ngaihtuah a, Toupa mel muh kal ka ngaklah hetkei zel. Tomchik damsung a Toupa adia banghiam bek sepkhiak malam chu ka ut petmah ahi.

Toupan kei adia a hinna le it lou ahihleh ken bangziak a haksa sak ding haulua ka hia chi in tha-thak ka la zel. Malam beidot huai leh phu peihlou pipi in kalsuan din ka kisa zel. Hiai ginna hia ahihkeileh Toupa thumanna? Ahi hi himai ta ve, Kei adia sipa adia ken le ka bangkim ka piak ngai sam hi.

Ka tomchik damsung na deihdan in zang in Toupa!