"Ka nu-le-pa ten sum tampi aneih chiang un..."

-LB Muan

Ni tampi leh hun sawtpi ka ngaihtuahna a kisual nilouh a, zum huai khawng kasak ziak in gelh khelou din ka ki dek teitei hi. Hun dang a ka thil tuahte gelhlou in omzou mahleng hiai pen in ka lungsim ahon kam lua a, ka hon gelhkhe mai hi. Ka lungsim khat ah ka taten a hong pichin nung khawng ua asim di un le deihhuai sakna le ka nei sim hi.

Nitak chiang in innkuan kikhopna ka neisek ua, achang in ka tapa kum 7 a upa “Dingding” le thugenna hun ka pezel uhi. Nitak khat innkuan kikhopna ah chu thu ahon gen pan a, Pathian in damna hon piak ziak a akipah dan khawng, school kai thei a aom ziak a a kipahdan khawng leh Pathian vualzawlna tampitak ka innkuan ua ka don ziak ua a kipahdan khawng hon gen hi.

Huchia thu hon gengen leh hong khase guih a, a mittui bang hong pawt in hong kah pau hi. Sawtpek apat ana deih kimawlna van khat hon gen a “Pathian in bangchik chiang a hon pe mahmah di adiam, Pathian inle hon pe ngeilou” chi in adeihluat dan kap kawm in hon genkhia hi. Aman le mittui khawng hon nul in amah leh amah ki hehnem kawm in a thugen hon zou a, huchi in thumna nei in innkuan kikhopna kazou uhi.

Innkuan kikhopna ka zohtak un ka kiang ah ka sam a, “Bawi na thil deih lah non gen ngeikei a, bangchidan te ahi himhim a na deih” chia ka dot leh aman “Papa nidang pek in khatvei kon gen ta ve, ahia aman tamlua ahi. En sum ki neilou a huaiziak a deih lawtel leng le huchi mai heh. Ka theisiam mai di” chi in mittui nul kawm in hon dawng hi.

A thil deih pen nikum lam pek a khatvei honna nget khak lam ken le ka phawk thak a, ka tapa lungsim sukha lua ahihleh chi in online a ka etpih chiang in aman ana tam ngut a, sang 2 sang 3 man khawng ana hi petmah hi. “Bawi hiai aman atam law voi” ka chihleh “ka gen vele aman tam ahi, en leizou lou di, huchi mai heh, ngaihsak dah ni” chi in hon dawng hi. Khatvei tei i lei na di aw chi in ka ihmutpih hi.

A zing in school kai hun a khua anoplouh ziak in puanak lum khat ka silhsak ua, huchi in a school uah a classroom kong bultan ka vakha hi. A class teacher nu un kei hon muh tak in honna houpih a. Ni bangzah hiam paita a Dingding kiang a athugen honna hilh hi. “Dingding kiang ah school sweater na lei di uh ahi chi a kana gen leh ka nu-le-paten sum tampi aneih chiang un ka lei di uh chia hon dawng ahi. Ka nuih zalua a kon hilh ahi” chi in a class teacher nu un nui kawm in hon gen hi.

A class teacher nu un hon gendan omzia bel school sweater lei dia hon noh ahi kei a, Dingding tawh a kihouna uh nuihzat huai salua a kei hon hilh hidan ahi. Kei le ka kisuanglah petmah a, “khovot hi nailou chi a kalei louh uh ahi. Kon leipah di uh aw” ka chihleh aman le “class a amah chouh in school sweater silhlou ahi a, tua a puanak lum pen asilh chiang a alawm ten pakta theihlua uh ahi” chi in hon dawng kik hi. Huai teng ki hou in ka kikhen uhi.

School huang sung a ka pailai in zum huai kasa tuntun a, achang in ka nuih bang a za a huchi in innlam kon zuan hi. School sweater leina man di zaw ka nei sam uhi, himahleh sum zatna di atam ziak in puanak lum dang khawng azat theih thou leh chidan a ka zatsak uh ahi. Ka tapa Dingding in ka sum neihlouh dan uh a theih ziak a sweater lei dia class teacher nu in agen pen le hon hilh sawn hetlou ana hidan ahi. Ka tapa naupang chik ka chihlai a kou anu-le-pate haksatna ana thei lawtel ahi maw chi in ka tapa tung natawm ah ka kisuanglah mahmah mai hi.

School kai tawp in Dingding tawh school sweater di ka va enpah ua. Ka leisak leh kipak law mahmah in kipahthu hon gen ngutngut mai hi. Inn katun tak un vanthak aneih chiang a ahihdan ngeina bang in Pathian kiang ah kipahthu genna nei hi.

Ei neulai a i gentheihdan khawng tunitan ki mangngilh thei nailou a, huaiziak a i tate chu a poimoh teng uh kisuktuah sakzou leh chih ki lunggulh law mahmah hi. Ahia i zohlouh hun hong omsek a, tua hun chiang in i mit a mittui dai ut mahmah hi.

Haksatna tampitak kituak sek mahleh tate lungsim nuamtak a hong khanlet uh ki deih a, huaiziak in tate lungsim nopna di khualna in amau zak in sum a buai hetlou dan in kipau sek hi. Ahia innkuan sung adia basic needs te natawm i suktuah zohlouh chiang in tate naupang chik hilai mahle uh i haksatdan ana theisiam mai uhi, huai in amau lungsim sukha mahmah a, neu apat hiai bang lungsim tawh hong khanglet ding uh deihhuai hetlou hi.

Kei le ka pa’n Pathian na sem a khaloh tawmchik petmah loh a honna chawm touh ka hihman in gentheihna tampitak hinkhua ah ka na palkha hi. Huaiziak in ka neu apat kapa nasep Pathian na semlou mawngmawng ding in ka lungtang kana hih khauh hi. Ahia ka utlouh pen mah sem ding in Pathian in hon sam a, tu in kum 10 val bang Pathian gam na kasemta hi.

Tu a ka lauh petmah chu hiai ahi. Ken nidang a kapa en a Pathian na sem utlou a ka lungtang ka hih khauh bang in ka tapa in kei haksatna mu in Pathian na sem utlou in a lungtang hon hih khauh kha di chih ka lau gu mahmah mai hi.

Ken haksatna ka tuah zaw ahi di mawng in ka koih mai a, ahia ka taten a hon tuah hial chiang un zaw ka lungtang in na sa law sam hi. Tate damdawi man di hial i neihlouh hun a zaw i nasepna lam a lungsim piak le haksa kisa petmah hi.