TULAI A SETAN VANZAT HOIH PEN.

-    LB Muan

23/05/22

Gingtu khat adin Khovel a Setan nasepdan theih poimoh petmah hi. Setan nasepdan i theihlouh chiang in i dou didan le kitheilou hi. Tua kia hilou in Pathian lam a pang i kisak nilouh lai a Setan lam a ana pang den hih khak theih hi. Huaiziak in Setan nasepdan sui vengveng a huchia a nasepdan i theih chiang a i dou didan hong chiang pan ding a, i dou didan i theih chiang in Setan tung ah vualzawhna ki ngah ding hi.

Setan in ahun leh amun dungzui in a nasepdan khek zel hi. Mihingte changkan dungzui inle a nasepdan khek toutou a, huaiziak in Setan a ki update bang a eile i ki update poimoh mahmah hi. Gamdang leh namdangte lak a Setan nasepdan i va suut ban dah ding a, eite lak a Setan nasepdan tamlou gen dia kisa ihi. I pi-le-pute hunlai in Setan in mihingte kilausak a, mite lauh in om hi. Miten alauh ziak un Setan suklungkim teitei sawm ua, kithoihna ana bawlsek uhi. Huchi in ganhing khawng that in mite ana kithoih ua, Dawi-le-Kau ana bia uhi.

Eiten tu hun a Jesu Khrist i biak pen i it ziak leh Pathian hing diktak ahihban ah eite hon tantu ahihziak a i biak hi ahi. Ahia malai miten Dawi-le-Kau a biak pen uh ana ngaih ziak uhiam ahihkeileh Dawi-le-Kau tung a akipah ziak ua ana biak uh ahi zenzen kei a, alauh ziak ua ana biak uh hizaw ahi. Setan in mihingte kilausak in mihingte ana thuzoh zou mahmah hi.

Huchi in i gam ah Tangthupha honglut a, awl-awl in Setan lauhna hong kiam in tuhun in ahihleh Dawi-le-Kau lau ki om nawn lou hi. Nidanglai hun bang in Dawi-le-Kau tawh kisai thute leh sikha laang ichih dante gen di om tam nawnlou a, a kigen chiang inle miten ki thupi koih nonlou hi. Huaiziak ahi ding a Setan in a nasepdan hon khek a, tu hun in ahihleh chituam deuh in na hon semta hi.

Alom-atang a gen ding hileh 1990 lakvel apat Setan in Khamtheih hon zang a, Tuailai tamtak in a hinna uh ana mangsak in innkuan tampitak in haksatna a tuahloh uhi. Nupa kikhen leh Tagah tampi omloh a, tunitan a khonung gu thuak den tamtak om hi. Setan in tuhun tan ah khamtheih zangtou lai a, himahleh tuhun in Setan in a nasepdan hon khek nawn ta hi. Khamtheih in hon subuai i sak mahmah lai un Khamtheih pen tuhun a Setan vanzat hoih pen ahi nawn zenzen kei hi. Khamtheih sang a vanzat hoih zaw khat neita a, tuhun a Setan vanzat pen ahihleh eiten i kipahpih mahmah uleh i haipih uh ahi a, hiai ahihleh thildang bangmah hilou in “SUM” ahi.

Setan ahihleh pil mahmah ahihman in eite hon zawh na ding in vanzat hoih penpen hon zang a, huchi in Setan in eite “Sum” in hon khempuk zengzung maita hi. A hausapen apat azawng pen, a pilpen apat ahai pen, laisiam pen apat siamlou pen, kha-mi pen apat kha-mi lou pen tan ah Setan in hiai “Sum” zang in hon bei nasa mahmah a, eiten lah “Sum” pen Setan vanzat ahihlam theilou in i kipahpih zawmah lai uhi.

“Sum” deihtakna ki neilian law mahmah a, muhna dik leh diklou natan ki khen kak theilou zen in i lungsim uh “Sum” a bumhai in ki om hi. Khotang lah “Sum” in sukbuai chihtak in subuai a, Innkuan sung ah le “Sum” alal pen hongsuakta hi. Nekzonna dik le diklou chih le kikhen nawn lou a, “Sum” muhna ding ahih nakleh sepmoh-bawlmoh ki neilou in poisak le ki nei nonlou hi. Innsung leh Khotang kia hilou in Saptuam sung nasan ah “Sum” chu alal pen hong hita maimah hi. Saptuam sung ah Khasiangthou in na sem nonlou a, “Sum” in na hon semta hi, huchih chiang in gingtute lak ah Kha-mitna a hong kiam deuhdeuh hi.

Setan in hon sukbuai na dia “Sum” chouh zang i chi zenzen kei a, himahleh eite lak ah “Sum” pen a vanzat hoih pen hi ahi. Bible in “Sum deihtakna zaw sualna bulpi ahi (1 Tim 6:10)” ana chi hi. Tuaban ah “Agam leh a diktatna zong masa un (Mt.6:33)” chi in hon thuhilh hi. Sum pen deihlouh ding ahihkeileh zon louh ding chihna ahi zenzen kei a, himahleh “Sum” i chih haichilh louh ding chihna ahi. Sum muhna dik-leh-diklou khen kak a, Pathian in a vualzawlna hon donsak zahzah a lungkim dan kisin ding ahi. Agam-leh-adiktatna zong masa in Pathian lauhna tawh kalsuan in, nekzong in, diktat in, khovel neih-le-lam sang in Van gou lungsim ah liansak zaw le Pathian i tung ah kipak ding a, a vualzawlna tamsem ki dong ding hi.

Innkuansung, Khotang leh Saptuam sung ah “Sum” alal pen a i koih sungteng uh i lungsim tawldamlou ding a, innkuansung leh khotang ah kituahna leh lemna omlou ding a, saptuam sung ah kha-mitna omlou ding hi.

Hiai Setan vanzat hoih pen apan suahtak sawm ni!

 

Article dang sim ut ten hiai anuai a link te ah simtheih ding.

 

RnR Blog: https://rebuildnrestore.blogspot.com/

RnRFB Page: https://www.facebook.com/RebuildRestore/

RnR Youtube Channel: https://youtube.com/c/REBUILDANDRESTORE